کینیڈا کے مغربی صوبے برٹش کولمبیا سے ایک انتہائی دلچسپ اور حیران کن واقعہ سامنے آیا ہے، جہاں ایک بھالو گالف کورس میں کھلاڑی کا بیگ چوری کر کے فرار ہوگیا۔
سوشل میڈیا پر وائرل ہونے والی ایک ویڈیو میں دیکھا جا سکتا ہے کہ پٹ میڈوز کے علاقے میں واقع 'گولڈن ایگل گالف کلب' میں کھیل کے دوران اچانک ایک بھالو میدان میں آ دھمکا اور وہاں کھڑی ایک گالف کارٹ سے بیگ نکال کر بھاگ کھڑا ہوا۔
میڈیا رپورٹس کے مطابق یہ شرارتی بھالو بیگ کو گھسیٹتا ہوا گالف کورس سے باہر لے گیا، جہاں ایک دوسرا بھالو پہلے ہی اس کا انتظار کر رہا تھا۔ تاہم، دونوں بھالو بیگ کو کچھ ہی دور لے جانے کے بعد وہیں چھوڑ کر جنگل کی طرف بھاگ نکلے۔
اس دلچسپ واقعے کی ویڈیو سوشل میڈیا پر تیزی سے مقبول ہو رہی ہے اور صارفین اس پر حیرت اور تفریح کا اظہار کر رہے ہیں۔