کراچی میں ایس آئی یو اور سی آئی اے نے مشترکہ کارروائی کے دوران مبینہ بھتہ خور گروہ کے دو ملزمان کو پولیس مقابلے میں ہلاک کردیا ہے۔ پولیس کے مطابق ہلاک ہونے والے ملزمان کی شناخت شیر خان عرف سہراب اور سعید محمد کے نام سے ہوئی ہے۔
پولیس کا دعویٰ ہے کہ یہ ملزمان ایک کروڑ روپے بھتہ طلب کرنے کے مقدمے میں مطلوب تھے اور انہوں نے گرفتاری سے بچنے کے لیے پولیس پر فائرنگ کی، جس کے بعد جوابی کارروائی میں دونوں مارے گئے۔ کارروائی کے دوران ملزمان کے قبضے سے دو پستول، دو موبائل فون اور بھتہ خوری کے لیے استعمال ہونے والا خصوصی موبائل فون برآمد کرلیا گیا ہے۔
ابتدائی تفتیش کے مطابق ہلاک ملزمان مبینہ طور پر افغانستان میں موجود کالعدم تحریک طالبان پاکستان کے کمانڈر فیض محمد عرف فیضی سے رابطے میں تھے۔ ایس آئی یو حکام کا کہنا ہے کہ ملزمان کے خلاف بھتہ خوری، غیر قانونی اسلحہ اور پولیس پر حملوں کے متعدد مقدمات پہلے سے درج ہیں، جبکہ واقعے کی مزید تفتیش جاری ہے۔