ویسٹ انڈیز کے لیجنڈری آل راؤنڈر اور دنیا کے عظیم ترین کرکٹرز میں شمار کیے جانے والے سر گیری سوبرز 89 برس کی عمر میں انتقال کر گئے۔
سر گیری سوبرز کو کرکٹ کی تاریخ کے ہمہ جہت کھلاڑیوں میں شمار کیا جاتا ہے۔ انہوں نے ویسٹ انڈیز کی جانب سے 93 ٹیسٹ میچز کھیلتے ہوئے 8 ہزار سے زائد رنز اسکور کیے اور 235 وکٹیں حاصل کیں، جبکہ اپنی شاندار آل راؤنڈ کارکردگی سے عالمی کرکٹ پر گہرے نقوش چھوڑے۔
فرسٹ کلاس کرکٹ میں بھی ان کا ریکارڈ غیرمعمولی رہا، جہاں انہوں نے 383 میچز میں 28 ہزار سے زائد رنز بنائے اور ایک ہزار سے زیادہ وکٹیں حاصل کیں۔
سر گیری سوبرز کے نام ایک تاریخی اعزاز بھی ہے۔ وہ کرکٹ کی تاریخ کے پہلے بیٹسمین تھے جنہوں نے ایک ہی اوور میں مسلسل 6 چھکے لگا کر نیا ریکارڈ قائم کیا، جو آج بھی کھیل کی تاریخ کا یادگار کارنامہ مانا جاتا ہے۔
سر گیری سوبرز کے انتقال پر دنیا بھر سے سابق و موجودہ کرکٹرز، شائقین اور کرکٹ تنظیموں کی جانب سے گہرے دکھ اور افسوس کا اظہار کیا جا رہا ہے۔ ان کی خدمات اور کارنامے ہمیشہ کرکٹ کی تاریخ کا روشن باب رہیں گے۔