کراچی کے علاقے نیا ناظم آباد سے دو روز قبل اغوا ہونے والے ڈھائی سالہ اذان علی خان کو پولیس نے خفیہ اطلاع پر ٹھٹہ کے قریب کامیاب کارروائی کرتے ہوئے بحفاظت بازیاب کرا لیا۔
ایس ایس پی ویسٹ طارق الٰہی مستوئی کے مطابق بچے کو تھانہ منگھوپیر کی حدود سے موٹر سائیکل سوار ملزم اغوا کر کے لے گیا تھا جس کے بعد مقدمہ درج کر کے سی سی ٹی وی فوٹیجز، تکنیکی شواہد اور دیگر سراغوں کی مدد سے خصوصی ٹیمیں تشکیل دی گئیں۔
پولیس نے ٹھٹہ کے قریب چھاپہ مار کر بچے کو بحفاظت بازیاب کر لیا۔ پولیس کا کہنا ہے کہ قانونی کارروائی مکمل ہونے کے بعد بچے کو والدین کے حوالے کر دیا جائے گا، جبکہ واقعے میں ملوث ملزمان کی گرفتاری کے لیے چھاپے جاری ہیں۔
اس واقعے کے بعد سوشل میڈیا پر بچے کی والدہ کے رویے پر بھی بحث چھڑ گئی۔ متعدد صارفین نے تنقید کرتے ہوئے کہا ہے والدہ بچے کی نسبت موبائل فون میں زیادہ مصروف دکھائی دے رہی ہیں۔