پاکستان ویمنز کرکٹ ٹیم کی کپتان فاطمہ ثنا نے سری لنکا کے خلاف آنے والی سیریز کے حوالے سے پرامید ہونے کا اظہار کرتے ہوئے کہا ہے کہ ٹیم ساؤتھ افریقہ اور زمبابوے کے خلاف سیریز کے مقابلے میں بہتر کارکردگی کا مظاہرہ کرے گی اور ماضی کی غلطیوں کو نہ دہرانے کی کوشش کی جائے گی۔
انہوں نے بتایا کہ ون ڈے سکواڈ کو جلد سے جلد مضبوط بنانے کے لیے سینئرز اور جونیئرز کا بہترین کمبی نیشن بنایا جا رہا ہے، جبکہ گل فیروزہ، صدف شمس اور سدرا امین کی حالیہ پرفارمنس بھی ٹیم کے لیے حوصلہ افزا ہے۔
فاطمہ ثنا کے مطابق ان کا مقصد زیادہ سے زیادہ میچ ونر کھلاڑی تیار کرنا ہے تاکہ ٹیم کو عالمی معیار کے مطابق ڈھالا جاسکے۔ انہوں نے واضح کیا کہ ٹیم آئندہ پازیٹو، اٹیکنگ اور نڈر کرکٹ کھیلے گی کیونکہ مستقبل میں دیگر بڑی ٹیموں کے ساتھ سخت مقابلے درپیش ہیں۔
انگلینڈ کی لیگ 'دی ہنڈرڈ' سے متعلق بات کرتے ہوئے کپتان کا کہنا تھا کہ وہ اس ٹورنامنٹ میں شرکت کے لیے انتہائی پرجوش ہیں، تاہم اس کی وجہ سے ٹی ٹوئنٹی سیریز مس ہونے پر افسوس بھی ہے۔
انہوں نے امید ظاہر کی کہ اس لیگ سے ملنے والے تجربے اور سیکھنے کے مواقع سے ان کی ساتھی کھلاڑیوں کو بھی فائدہ پہنچے گا۔