میڈیا رپورٹس کے مطابق سابق آسٹریلوی بیٹر ڈیوڈ وارنر نے شراب پی کر گاڑی چلانے کے کیس میں اپنا جرم قبول کرلیا ہے۔ ڈیوڈ وارنر کو اپریل میں پاکستان سپر لیگ (پی ایس ایل) کے دوران چند روز کی چھٹیوں پر سڈنی آمد کے موقع پر دوستوں کی ایک دعوت سے گھر واپسی کے دوران رینڈم ڈرنک ڈرائیو ٹیسٹ مثبت آنے پر چارج کیا گیا تھا۔
مئی میں ڈیوڈ وارنر کے وکیل نے عدالت کو بتایا تھا کہ انہوں نے اپنی ذمہ داری قبول کرلی ہے اور اس واقعے کو ایک احمقانہ حرکت قرار دیا ہے۔ بدھ کو ہونے والی سماعت کے دوران ڈیوڈ وارنر کی ذاتی طور پر عدالت میں پیشی ضروری نہیں تھی، تاہم ان کے وکیل نے عدالت کو باضابطہ طور پر ان کے جرم قبول کرنے سے آگاہ کردیا ہے۔
کیس کی مزید سماعت 18 اگست کو ہوگی جہاں ڈیوڈ وارنر کو سزا سنائی جائے گی۔ اس چارج کی کم سے کم سزا 6 ماہ کے لیے ڈرائیونگ سے نااہلی ہے، جبکہ اس میں 2200 آسٹریلوی ڈالرز جرمانہ اور 9 ماہ تک جیل کی سزا بھی شامل ہے۔