وفاقی حکومت نے پیٹرول اور ہائی اسپیڈ ڈیزل کی قیمتوں میں اضافے کے بعد مٹی کے تیل کی قیمت بھی بڑھا دی ہے۔
اوگرا کی جانب سے جاری نوٹیفکیشن کے مطابق مٹی کے تیل کی قیمت میں 7 روپے 80 پیسے فی لیٹر اضافہ کیا گیا ہے جس کے بعد نئی قیمت 297 روپے 17 پیسے فی لیٹر مقرر کر دی گئی ہے۔
نوٹیفکیشن میں بتایا گیا ہے کہ اس سے قبل مٹی کا تیل 289 روپے 37 پیسے فی لیٹر میں فروخت ہو رہا تھا۔ نئی قیمت کا اطلاق 23 جولائی کے لیے کیا گیا ہے جبکہ آئندہ قیمتوں کا اعلان کل رات دوبارہ کیا جائے گا۔
واضح رہے کہ حکومت نے اس سے قبل پیٹرول اور ہائی اسپیڈ ڈیزل کی قیمتوں میں بھی اضافہ کیا تھا جس کے بعد اب مٹی کے تیل کی قیمت میں اضافے سے صارفین پر مہنگائی کا مزید بوجھ پڑے گا۔