کوہاٹ میں انڈس ہائی وے پر نامعلوم مسلح افراد کی فائرنگ کے نتیجے میں ایک کسٹم اہلکار شہید جبکہ دو اہلکار زخمی ہوگئے۔
پولیس کے مطابق واقعہ اس وقت پیش آیا جب کسٹم اہلکار معمول کی چیکنگ میں مصروف تھے۔ اس دوران نامعلوم حملہ آوروں نے ان کی گاڑی کو نشانہ بناتے ہوئے اندھا دھند فائرنگ کردی، جس سے گاڑی میں آگ بھڑک اٹھی۔
پولیس نے بتایا کہ شہید ہونے والے کسٹم اہلکار کی شناخت یاسر شاہ کے نام سے ہوئی ہے، جبکہ زخمی اہلکاروں کو فوری طور پر اسپتال منتقل کردیا گیا، جہاں انہیں طبی امداد فراہم کی جا رہی ہے۔
واقعے کے بعد پولیس اور قانون نافذ کرنے والے اداروں نے علاقے کو گھیرے میں لے کر سرچ آپریشن شروع کردیا۔ پولیس حکام کا کہنا ہے کہ حملہ آوروں کی گرفتاری کے لیے کارروائی جاری ہے اور واقعے کے مختلف پہلوؤں سے تحقیقات کی جا رہی ہیں۔