برائن لارا اکیڈمی گراؤنڈ میں سنیچر کے روز بارش سے متاثرہ پہلے ٹیسٹ کے پہلے دن پاکستان کے فاسٹ باؤلرز سازگار حالات کا فائدہ اٹھانے میں ناکام رہے، اور ویسٹ انڈیز نے دن کے اختتام تک 3 وکٹوں کے نقصان پر 194 رنز بنا لیے۔
ٹاس جیت کر پہلے بیٹنگ کا فیصلہ کرنے والی ویسٹ انڈیز کی ٹیم نے بارش کے بار بار کے خلل اور ایک ایسی غیر ہموار پچ کا ڈٹ کر مقابلہ کیا جہاں گیند کچھ سوئنگ اور سیم ہو رہی تھی۔ ویسٹ انڈیز کی اس مزاحمت میں کیوم ہوج کی 181 گیندوں پر ناٹ آؤٹ 83 اور شائی ہوپ کی ناٹ آؤٹ 39 رنز کی اننگز نے اہم کردار ادا کیا۔
دوسرے سیشن میں 106 رنز پر تین وکٹیں گرنے کے بعد ان دونوں بلے بازوں نے چوتھی وکٹ کے لیے 88 رنز کی شراکت قائم کی۔
بارش کے باعث پہلے سیشن میں صرف 14.2 اوورز کا کھیل ہی ممکن ہو سکا، جبکہ خراب روشنی کی وجہ سے جب کھیل جلد ختم کیا گیا تو پورے دن میں صرف 67 اوورز ہی پھینکے جا سکے۔ ہوج نے 9 چوکوں کی مدد سے اننگز کو سنبھالے رکھا، جبکہ اوپنر چندرپال نے بھی 21 رنز کا حصہ ڈالا۔
پاکستان کی جانب سے تجربہ کار فاسٹ باؤلر محمد عباس نے دو جبکہ عامر جمال نے ایک وکٹ حاصل کی۔
عامر جمال جنوری 2025 کے بعد اپنا پہلا ٹیسٹ کھیل رہے ہیں، جبکہ پاکستان نے بائیں ہاتھ کے اسپنر علی عثمان کو بھی ٹیسٹ کیپ دی ہے جنھوں نے دن کے دوران 12 اوورز باؤلنگ کی۔
میچ آگے بڑھنے کے ساتھ پچ کی حالت مزید خراب ہونے کی توقع ہے، اسی لیے ویسٹ انڈیز کی ٹیم—جو چار فاسٹ باؤلرز جیڈن سیلز، کیمار روچ، شیمار جوزف اور جسٹن گریوز کے علاوہ دو اسپنرز روسٹن چیز اور جومل واریکن کے ساتھ میدان میں اتری ہے—کم از کم 350 رنز کا ٹوٹل بورڈ پر سجانے کی امید رکھے گی۔
پاکستانی فاسٹ باؤلرز پچ اور ماحول کا مکمل فائدہ اٹھانے میں ناکام رہے، جہاں عباس، خرم شہزاد، محمد علی اور جمال مسلسل 130 کلومیٹر فی گھنٹہ کی رفتار سے باؤلنگ کرنے میں بھی جدوجہد کرتے نظر آئے۔
پاکستان کی پلئینگ الیون کے بیٹنگ آرڈر میں امام الحق، اذان اویس، بابر اعظم، سلمان علی آغا، محمد رضوان اور شان مسعود شامل ہیں۔