لاہور قلندرز کے بیٹر عبداللہ شفیق کو قومی ٹیم کی ذمہ داریوں کے لیے طلب کرلیا گیا ہے، جس کے باعث وہ گیانا میں جاری گلوبل سپر لیگ کے بقایا میچز میں ٹیم کو دستیاب نہیں ہوں گے۔
فرانچائز نے ان کے متبادل کے طور پر بنگلا دیش کے آل راؤنڈر شمیم حسین کو باقی ٹورنامنٹ کے لیے اسکواڈ میں شامل کرلیا ہے۔
لاہور قلندرز نے عبداللہ شفیق کو قومی ٹیم میں منتخب ہونے پر مبارکباد دیتے ہوئے ان کے لیے نیک خواہشات کا اظہار کیا ہے اور شمیم حسین کو ٹیم کا حصہ بننے پر خوش آمدید کہا ہے۔
پوائنٹس ٹیبل پر اس وقت لاہور قلندرز تین میچوں میں چار پوائنٹس کے ساتھ دوسرے نمبر پر ہے، جس نے اپنے سفر کا آغاز پارتھ اسکارچرز الیون کے خلاف 16 رنز کی فتح سے کیا تھا اور بعد ازاں ڈیزرٹ وائپرز کو 38 رنز سے شکست دی تھی، جبکہ گزشتہ رات اسے گیانا ایمیزون واریئرز کے خلاف ٹورنامنٹ میں اپنی پہلی شکست کا سامنا کرنا پڑا۔