کراچی پورٹ پر دنیا کے بڑے کنٹینر بردار جہازوں میں شمار ہونے والا ایم ایس سی مرجام (MSC Mirjam) لنگر انداز ہوگیا ہے۔
400 میٹر طویل اور 19 ہزار 500 ٹی ای یوز گنجائش کا حامل یہ جہاز ساؤتھ ایشیا پاکستان ٹرمینل (SAPT-2) پر برتھ ہوا ہے۔
ترجمان کے پی ٹی کے مطابق ایم ایس سی مرجام کے لیے صبح 11 بجے پائلٹ آن بورڈ ہوا اور دوپہر 12 بجے جہاز برتھ سے منسلک ہوگیا۔ اس جہاز پر تقریباً 1,500 کنٹینرز کی ہینڈلنگ متوقع ہے، جس کے بعد اس کی اگلی منزل صلالہ (عمان) ہوگی۔
ترجمان کا کہنا ہے کہ کے پی ٹی کے میرین پائلٹس اور آپریشنز ٹیم نے اپنی پیشہ ورانہ مہارت کا عملی مظاہرہ کرتے ہوئے الٹرا لارج کنٹینر ویسل کی کامیابی سے ہینڈلنگ کی، جس سے کے پی ٹی ایک بار پھر سرخرو ہوا ہے۔
کراچی پورٹ پر ایسے بڑے بحری جہازوں کی مسلسل آمد ملکی بندرگاہی صلاحیت کا واضح ثبوت ہے، جس سے بین الاقوامی شپنگ لائنز کا کراچی پورٹ پر اعتماد مزید مستحکم ہو رہا ہے۔