کراچی کے علاقے عزیز آباد میں نامعلوم مسلح افراد کی فائرنگ کے نتیجے میں ایم کیو ایم کے سابق یونٹ انچارج سمیع رحمانی جاں بحق جبکہ ان کا بیٹا فصیح زخمی ہوگیا۔
پولیس کے مطابق مقتول سمیع رحمانی ایم کیو ایم یونٹ 153 کے سابق انچارج اور ایک بینک سے ریٹائرڈ ملازم تھے جبکہ ان کا زخمی بیٹا فصیح بھی نجی بینک میں ملازمت کرتا ہے۔
ابتدائی تحقیقات کے مطابق چار مسلح ملزمان گھر کا عقبی دروازہ توڑ کر اندر داخل ہوئے اور باپ بیٹے پر اندھا دھند فائرنگ کر کے فرار ہوگئے۔ پولیس کا کہنا ہے کہ جائے وقوعہ سے گولیوں کے چھ خول برآمد ہوئے ہیں۔
کرائم سین یونٹ نے موقع پر پہنچ کر شواہد اکٹھے کر لیے ہیں، جبکہ اطراف میں نصب سی سی ٹی وی کیمروں کی فوٹیج حاصل کر کے ملزمان کی شناخت کی کوشش کی جا رہی ہے۔
پولیس کے مطابق ملزمان واردات کے دوران گھر سے کوئی سامان ساتھ نہیں لے گئے جبکہ واقعے کی مختلف پہلوؤں سے تحقیقات جاری ہیں۔