میری وفاداری عہدے سے نہیں، پاکستان سے ہے، کپتانی سے ہٹائے جانے کے بعد عماد بٹ کا ردعمل

پاکستان ہاکی ٹیم کے سابق کپتان عماد بٹ نے کپتانی سے ہٹائے جانے کے بعد اپنے پہلے ردعمل میں کہا ہے کہ پاکستان کی نمائندگی ان کے لیے سب سے بڑا اعزاز ہے اور کپتانی ختم ہو سکتی ہے لیکن وطن کے لیے ان کا جذبہ کبھی کم نہیں ہوگا۔

اپنے بیان میں عماد بٹ نے کہا کہ انہیں پاکستان کو آٹھ سال بعد ہاکی ورلڈ کپ کے لیے کوالیفائی کرانے پر فخر ہے۔ ان کے بقول یہ کامیابی صرف ان کی نہیں بلکہ پوری قوم اور پاکستان ہاکی کی مشترکہ کامیابی ہے۔

سابق کپتان نے کہا کہ ان کی وفاداری کسی عہدے سے نہیں بلکہ پاکستان سے ہے، اور وہ پہلے کی طرح پوری لگن اور جذبے کے ساتھ قومی ٹیم کے لیے کھیلتے رہیں گے۔ انہوں نے کہا کہ پاکستان کا پرچم بلند کرنا ہمیشہ ان کی اولین ترجیح رہے گی، جبکہ ہاکی نے انہیں عزت، پہچان اور ملک کی نمائندگی کا اعزاز دیا ہے۔

عماد بٹ نے قومی ٹیم کے نئے کپتان ابوبکر کو ذمہ داری سنبھالنے پر مبارکباد دیتے ہوئے کہا کہ ان کا تجربہ، رہنمائی اور مکمل حمایت ہمیشہ نئے کپتان کے ساتھ رہے گی۔ انہوں نے اس عزم کا اظہار بھی کیا کہ قومی ٹیم ایک پرچم اور ایک مقصد کے تحت متحد ہو کر پاکستان کے لیے کھیلتی رہے گی۔