محکمہ تعلیم سندھ نے صوبے بھر کے سرکاری اور نجی اسکولوں کو یکم اگست سے ہفتے میں 6 روز کھولنے کی ہدایت جاری کر دی ہے۔
اس حوالے سے جاری نوٹیفکیشن کے مطابق یکم اگست سے سندھ بھر کے تمام سرکاری اور نجی تعلیمی اداروں میں پیر سے ہفتہ تک باقاعدہ تدریسی سرگرمیاں جاری رہیں گی، جبکہ صرف اتوار کو تعطیل ہوگی۔
محکمہ تعلیم کے مطابق نئے شیڈول کا اطلاق یکم اگست سے فوری طور پر ہوگا اور تمام تعلیمی ادارے اس پر عمل درآمد کے پابند ہوں گے۔
واضح رہے کہ رواں سال 31 مارچ کو وزیر تعلیم سندھ سردار شاہ نے صوبے کے اسکولوں میں ہفتہ اور اتوار دو روزہ ہفتہ وار تعطیلات کا اعلان کیا تھا، تاہم اب اس فیصلے میں تبدیلی کرتے ہوئے دوبارہ چھ روزہ تدریسی ہفتہ بحال کر دیا گیا ہے۔