پاکستان وائٹ بال کرکٹ ٹیم کے ہیڈ کوچ مائیک ہیسن نے کہا ہے کہ قومی ٹیم ورلڈ کپ کی تیاریوں میں مصروف ہے اسی مقصد کے لیے چار ٹاپ ٹیموں پر مشتمل ٹورنامنٹ کا انعقاد کیا جا رہا ہے۔
میڈیا سے گفتگو کرتے ہوئے مائیک ہیسن نے کہا کہ وائٹ بال کیمپ میں کھلاڑی بھرپور ٹریننگ کر رہے ہیں اور سیزن کے آغاز میں انہیں اپنی صلاحیتیں دکھانے کا موقع ملے گا۔ یہ ایک ٹاپ کلاس ٹورنامنٹ ہوگا جس میں اچھی کرکٹ دیکھنے کو ملے گی اور تمام کھلاڑیوں کو اپنی کارکردگی دکھانے کا موقع ملے گا۔
انہوں نے کہا کہ کرکٹرز کو زیادہ سے زیادہ لسٹ اے میچز کھیلنے کے مواقع فراہم کیے جا رہے ہیں۔ ہمارے لیے اصل چیلنج یہی ہے کہ کھلاڑیوں کو بھرپور مواقع دیے جائیں جس کے لیے مکمل منصوبہ بندی کی جا رہی ہے۔
مائیک ہیسن کا کہنا تھا کہ پاکستان کی روایت رہی ہے کہ وہ بڑے ایونٹس میں بہترین کارکردگی دکھاتی ہے امید ہے کہ ایک بار پھر میگا ایونٹ میں اچھی پرفارمنس سامنے آئے گی۔
ہیڈ کوچ نے کہا کہ سلیکٹرز نے چاروں ٹیموں کے لیے اچھے کمبی نیشن تیار کیے ہیں جہاں سے بہترین پرفارمرز سامنے آئیں گے۔مائیک ہیسن نے کہا کہ ماضی میں ہم دوسروں کی طرح مقابلہ کرنے والی ٹیم نہیں تھے، لیکن اب ہماری ٹیم مقابلہ کر رہی ہے اور مسلسل بہتری کی جانب گامزن ہے۔