پیٹرولیم مصنوعات کی قیمتوں میں حالیہ اضافے پر شہریوں نے شدید مایوسی اور تشویش کا اظہار کرتے ہوئے کہا ہے کہ موجودہ مہنگائی کے دور میں معمولی اضافہ بھی ان کے لیے ناقابلِ برداشت بنتا جا رہا ہے۔
شہریوں کا کہنا ہے کہ پیٹرول اور ڈیزل کی قیمتوں میں اضافے کے ساتھ ہی ٹرانسپورٹ کے کرایوں، اشیائے ضروریہ اور روزمرہ استعمال کی دیگر اشیا کی قیمتوں میں بھی اضافہ ہو جاتا ہے، جس سے گھریلو بجٹ مزید متاثر ہوتا ہے۔
انہوں نے حکومت سے مطالبہ کیا کہ بڑھتی ہوئی مہنگائی پر قابو پانے کے لیے مؤثر اقدامات کیے جائیں اور عوام کو فوری ریلیف فراہم کیا جائے تاکہ انہیں معاشی مشکلات سے نجات مل سکے۔
واضح رہے کہ وفاقی حکومت نے گزشتہ رات پیٹرول کی قیمت میں ایک روپے 9 پیسے فی لیٹر جبکہ ہائی اسپیڈ ڈیزل کی قیمت میں 2 روپے 42 پیسے فی لیٹر اضافہ کیا تھا۔ نئے نرخوں کے مطابق پیٹرول کی قیمت 336 روپے 15 پیسے فی لیٹر جبکہ ہائی اسپیڈ ڈیزل کی قیمت 393 روپے 4 پیسے فی لیٹر مقرر کردی گئی ہے۔