کراچی میں معروف بزنس مین عارف حبیب اور ان کے گروپ کا نام استعمال کر کے عوام کے ساتھ فراڈ کرنے کا انکشاف ہوا ہے، جس کے بعد عارف حبیب لمیٹڈ نے اس حوالے سے اسٹاک ایکسچینج کو باقاعدہ خط لکھ کر آگاہ کر دیا ہے۔
خط میں واضح کیا گیا ہے کہ 'عارف حبیب آرٹیفیشل انٹیلی جنس' (اے آئی) کے نام سے کوئی پلیٹ فارم قائم نہیں کیا گیا اور نہ ہی عارف حبیب یا ان کے گروپ کی کسی کمپنی کا اس پلیٹ فارم سے کوئی تعلق ہے۔ خط کے متن کے مطابق، اس جعلی اے آئی پلیٹ فارم کے ذریعے لوگوں کو سرمایہ کاری کرنے پر 5 لاکھ روپے فی ہفتہ منافع کی پیشکش کی جا رہی ہے۔
عارف حبیب لمیٹڈ کی جانب سے سختی سے تردید کی گئی ہے کہ ادارے نے ایسی کوئی اے آئی اسکیم لانچ نہیں کی ہے۔ خط میں بتایا گیا ہے کہ بعض عناصر ادارے کا نام استعمال کر کے فراڈ، بے بنیاد اور غیر قانونی کاموں میں ملوث ہیں۔
کمپنی نے واضح کیا ہے کہ وہ اپنے تمام فیصلے اور معلومات ہمیشہ باقاعدہ آفیشل چینلز اور اسٹاک ایکسچینج کے ذریعے ہی جاری کرتی ہے۔