پاکستان کی آٹو موبائل صنعت کے لیے ایک اہم پیش رفت سامنے آئی ہے، جہاں مقامی طور پر تیار کی جانے والی گاڑیاں اب بنگلا دیش کی مارکیٹ میں بھی فروخت کی جائیں گی۔ ایم جی جے ڈبلیو آٹوموبائل پاکستان اور بنگلا دیش کے رینکون گروپ کے درمیان گاڑیوں کی برآمد کے لیے مفاہمتی یادداشت (ایم او یو) پر دستخط کردیے گئے ہیں۔
معاہدے پر دستخط معاونِ خصوصی برائے صنعت و پیداوار ہارون اختر خان کی موجودگی میں کیے گئے۔ معاہدے کے مطابق پاکستان رواں سال بنگلا دیش کو 100 مقامی طور پر تیار کردہ گاڑیاں برآمد کرے گا، جبکہ آئندہ چار برسوں میں مجموعی طور پر 5 ہزار 800 گاڑیاں برآمد کرنے کا ہدف مقرر کیا گیا ہے۔
اس موقع پر ہارون اختر خان نے کہا کہ یہ معاہدہ پاکستان کی مینوفیکچرنگ صلاحیتوں پر عالمی اعتماد کا مظہر ہے اور اس سے ملک کو قیمتی زرمبادلہ حاصل ہوگا۔ انہوں نے کہا کہ حکومت برآمدات میں اضافے، مقامی صنعت کے استحکام اور سرمایہ کاری کے لیے سازگار ماحول کی فراہمی پر خصوصی توجہ دے رہی ہے۔
ان کا کہنا تھا کہ نئی آٹو پالیسی کے تحت پاکستان کو خطے کا ایک اہم آٹو مینوفیکچرنگ مرکز بنانے کا ہدف مقرر کیا گیا ہے، جبکہ اس معاہدے سے مقامی آٹو موبائل صنعت کو نئی برآمدی منڈیاں ملیں گی اور ملکی معیشت کو بھی تقویت حاصل ہوگی۔