پاکستان کی باصلاحیت باکسر فاطمہ زہرا نے کامن ویلتھ گیمز کے ویمنز 60 کلوگرام مقابلوں میں کانسی کا تمغہ جیت کر ملک کے لیے اعزاز حاصل کر لیا۔
سیمی فائنل میں فاطمہ زہرا کا مقابلہ کینیڈا کی باکسر ماریا سے ہوا جہاں انہیں شکست کا سامنا کرنا پڑا۔ مقابلے کے پہلے راؤنڈ میں کینیڈین باکسر کو 4-1 کی برتری حاصل تھی، جبکہ دوسرے راؤنڈ میں ریفری نے مقابلہ روک دیا جس کے بعد فاطمہ زہرا کانسی کے تمغے کی حقدار قرار پائیں۔
فاطمہ زہرا نے کوارٹر فائنل میں نیوزی لینڈ کی جارڈن ولسن کو شکست دے کر سیمی فائنل میں جگہ بنائی تھی۔
فاطمہ زہرا کی کامیابی کئی حوالوں سے تاریخی اہمیت رکھتی ہے۔ 2014 کے بعد پہلی مرتبہ پاکستان نے کامن ویلتھ گیمز کے باکسنگ ایونٹ میں کوئی تمغہ جیتا ہے جبکہ فاطمہ زہرا کامن ویلتھ گیمز کی باکسنگ میں میڈل حاصل کرنے والی پہلی پاکستانی خاتون باکسر بن گئی ہیں۔
میڈل جیتنے کے بعد فاطمہ زہرا نے کہا کہ ان کی ٹیم کی نظریں سونے کے تمغے پر تھیں، تاہم کانسی کا تمغہ بھی پاکستانی خواتین باکسرز کے لیے ایک بڑی کامیابی ہے۔
انہوں نے کہا یہ ہمارا پہلا قدم ہے ہم گولڈ میڈل کی بھی امید کر رہے تھے، لیکن یہ برانز میڈل ثابت کرتا ہے کہ ہم درست سمت میں آگے بڑھ رہے ہیں اور اس مقام تک پہنچنے کے لیے ہم نے طویل سفر طے کیا ہے۔