"ہمارے والد کی بے عزتی کرنے کا کسی کو حق نہیں۔ کسی نے ان کی زندگی میں ہماری مدد نہیں کی، لیکن اب ان کے بارے میں غلط باتیں پھیلائی جا رہی ہیں۔ یہ کہنا سراسر غلط ہے کہ میری طلاق کی وجہ سے انہیں دل کا دورہ پڑا۔ میری طلاق نہیں ہوئی، یہ جھوٹی خبر ہے۔ ہمارے والد ہمارے ساتھ اچھے تعلقات رکھتے تھے اور ہمارے شوہروں نے بھی ہمیشہ ان کی عزت کی۔"
پاکستان کے معروف کامیڈین اللہ رکھا پیپسی کی وفات کے بعد ان کی بیٹیوں نے اداکار سہیل احمد کے بیان پر سخت ردعمل دے دیا۔ انہوں نے سہیل احمد کے اس دعوے کو مسترد کر دیا کہ بیٹی کی طلاق کے صدمے نے ان کے والد کو دل کا دورہ پڑنے کا سبب بنایا۔
اللہ رکھا پیپسی کی بیٹیوں کا کہنا ہے کہ ان کے والد کے بارے میں غلط تاثر پیش کیا جا رہا ہے۔ انہوں نے واضح کیا کہ اگرچہ وہ اکیلے رہتے تھے، تاہم خاندان کے ساتھ ان کے تعلقات خوشگوار تھے اور تمام اہل خانہ ان کا احترام کرتے تھے۔ ان کے مطابق طلاق سے متعلق گردش کرنے والی خبریں بے بنیاد ہیں اور اس سے ان کے والد اور خاندان کی ساکھ کو نقصان پہنچا ہے۔