ہم تو آپ کو بچپن سے دیکھ رہے ہیں، غنیٰ علی کے عمر بتانے پر مداح حیران

پاکستانی اداکارہ غنیٰ علی رضا کی ایک انسٹاگرام ریل نے سوشل میڈیا پر نئی بحث چھیڑ دی ہے۔ اس بار موضوع ان کی اداکاری نہیں بلکہ ان کی عمر بنی، جس پر مداحوں کی رائے منقسم نظر آئی۔

غنیٰ علی نے اپنی ایک ریل شیئر کرتے ہوئے مزاحیہ انداز میں لکھا، "جب لوگ مجھ سے پوچھتے ہیں کہ تفریح کے لیے کیا کرتی ہو؟ میں 31 سال کی ہوں، دو بچوں کی ماں ہوں۔ اب میری پسندیدہ چیزیں خاموشی، کافی، دوستوں کو ریلز بھیجنا، گھر میں عجیب حرکتیں کرنا اور منصوبے منسوخ ہونے پر خوش ہونا ہیں۔"

کیپشن سامنے آتے ہی صارفین کی توجہ ان کی عمر پر مرکوز ہوگئی۔ متعدد افراد نے حیرت کا اظہار کرتے ہوئے کہا کہ وہ برسوں سے غنیٰ علی کو ٹی وی اسکرین پر دیکھ رہے ہیں، اس لیے ان کا صرف 31 سال کا ہونا یقین سے باہر لگتا ہے۔ بعض نے دعویٰ کیا کہ اداکارہ اپنی اصل عمر سے کم بتا رہی ہیں، جبکہ کچھ نے انہیں چالیس برس کے قریب قرار دیا۔

دوسری جانب کئی مداح غنیٰ علی کے دفاع میں بھی سامنے آئے۔ ان کا کہنا تھا کہ کسی خاتون کی عمر پر بحث کرنا مناسب نہیں اور اگر اداکارہ نے اپنی عمر بتائی ہے تو اس کا احترام کیا جانا چاہیے۔ غنیٰ علی نے تاحال اس بحث یا صارفین کے تبصروں پر کوئی ردعمل نہیں دیا۔