’’یہ بات درست ہے کہ شادی سے پہلے ہم ایک دوسرے کے ساتھ تھے، سب اس بات سے واقف ہیں۔ 1996 سے 2003 تک ہماری دوستی رہی، پھر ہم نے شادی کرلی۔ ہمارے دو بچے ہیں اور شادی سے پہلے بھی ہم ایک دوسرے کو پسند کرتے تھے۔ ہم الگ رہ رہے ہیں، طلاق نہیں ہوئی۔ بچے خوشبو کے ساتھ ہیں، وہ مجھ سے ملنے آتے ہیں اور میں لاہور جاکر ان سے ملتا ہوں۔ ہمارا بچوں کے ساتھ تعلق بہت اچھا ہے، بڑے بیٹے نے او لیولز مکمل کرلیے ہیں۔‘‘
پاکستانی فلم اسٹار ارباز خان نے اپنی اہلیہ اداکارہ خوشبو سے متعلق طلاق کی خبروں پر وضاحت کرتے ہوئے کہا ہے کہ دونوں کے درمیان طلاق نہیں ہوئی بلکہ وہ صرف الگ رہ رہے ہیں۔
ارباز خان نے ڈسکور پاکستان کے پوڈکاسٹ میں شرکت کے دوران اپنی ذاتی زندگی کے بارے میں کھل کر بات کی۔ انہوں نے بتایا کہ خوشبو سے ان کی قربت شادی سے کئی برس قبل شروع ہوئی تھی اور دونوں نے 2004 میں شادی کی۔ اس رشتے سے ان کے دو بیٹے ہیں۔
چند روز قبل خوشبو خان کی جانب سے طلاق کا اعلان سامنے آنے کے بعد دونوں کی ازدواجی زندگی ایک بار پھر خبروں میں آگئی تھی، تاہم ارباز خان نے اس دعوے کی تردید کرتے ہوئے واضح کیا کہ وہ اور خوشبو اس وقت الگ رہتے ہیں لیکن قانونی طور پر ان کی طلاق نہیں ہوئی۔
ارباز خان نے یہ بھی کہا کہ وہ اپنی نجی زندگی کو عوام کے سامنے لانا پسند نہیں کرتے۔ ان کے مطابق بچوں کی پرورش خوشبو کے ساتھ ہورہی ہے، تاہم وہ مسلسل اپنے والد سے رابطے میں ہیں اور دونوں کے درمیان بچوں کے حوالے سے اچھا تعلق برقرار ہے۔
ارباز خان نے فلم ’’گھونگھٹ‘‘ سے اپنے کیریئر کا آغاز کیا تھا اور بعد میں پنجابی اور پشتو فلموں میں بھی کام کیا۔ ٹی وی ڈرامہ ’’دو بوند پانی‘‘ میں میرا کے ساتھ ان کی اداکاری کو بھی پسند کیا گیا، جبکہ وہ جلد ہی ہمایوں ٹی وی کے ڈرامے ’’جن کی شادی ان کی شادی‘‘ میں جن کے کردار میں نظر آئیں گے۔