پاکستانی اداکارہ ماہرہ خان کی 41 سال کی عمر میں دوبارہ ماں بننے کی خبر کے بعد ایک نجی ٹی وی پروگرام میں ان کی عمر کے حوالے سے استعمال کیے گئے الفاظ نے سوشل میڈیا پر بحث چھیڑ دی۔
ماہرہ خان نے حال ہی میں اپنی دوسری حمل کی خوشخبری مداحوں کے ساتھ شیئر کی تھی۔ اداکارہ نے بتایا کہ 41 سال کی عمر میں دوبارہ ماں بننے کا تجربہ ان کے لیے 24 سال کی عمر کے مقابلے میں جسمانی اور جذباتی طور پر مختلف ہے۔
اسی موضوع پر ایک ٹی وی پروگرام میں طبی ماہرین کے ساتھ زیادہ عمر میں حمل کے حوالے سے گفتگو کی گئی، تاہم پروگرام میں ماہرہ خان کے لیے ’بوڑھی خاتون‘ کی اصطلاح استعمال کی گئی، جس پر سوشل میڈیا صارفین نے اعتراض کیا۔
صارفین کا کہنا ہے کہ کسی 41 سالہ خاتون کے لیے اس طرح کی اصطلاح استعمال کرنا مناسب نہیں۔ ایک صارف نے کہا کہ اگر خاتون صحت مند ہے تو 40 سال کی عمر کو بڑھاپا قرار دینا درست نہیں، جبکہ ایک اور خاتون نے اپنا تجربہ شیئر کرتے ہوئے بتایا کہ وہ بھی 41 سال کی عمر میں قدرتی طور پر حاملہ ہوئی تھیں۔