معروف پاکستانی گلوکار اور موسیقار عمیر جسوال کے والد طارق مجید جسوال انتقال کرگئے، جس کی اطلاع گلوکار نے سوشل میڈیا کے ذریعے اپنے مداحوں اور دوستوں کے ساتھ شیئر کی۔
عمیر جسوال کے والد کا شمار ہائیڈروکاربنز کے شعبے کی معروف شخصیات میں ہوتا تھا۔ ان کے انتقال کی خبر سامنے آتے ہی شوبز سے وابستہ افراد اور مداحوں کی جانب سے گہرے دکھ اور افسوس کا اظہار کیا گیا۔
عمیر جسوال کے بھائی عزیر جسوال اور یاسر جسوال بھی موسیقی اور فنونِ لطیفہ سے وابستہ ہیں۔ والد کے انتقال کی خبر نے جسوال خاندان کو غمزدہ کردیا، جبکہ مداح بھی اس مشکل وقت میں خاندان کے ساتھ اظہارِ ہمدردی کررہے ہیں۔
سوشل میڈیا پر صارفین نے "انا للہ وانا الیہ راجعون" کے ساتھ مرحوم کے لیے مغفرت اور خاندان کے لیے صبر کی دعائیں کیں۔ عمیر جسوال نے بھی اپنے والد کے انتقال کی افسوسناک خبر اپنے انسٹاگرام اکاؤنٹ پر شیئر کی۔