پاکستانی ڈراموں اور فلموں کے معروف اداکار نعمان حبیب ان دنوں اپنی والدہ کے انتقال کے باعث غم سے گزر رہے ہیں تاہم قبرستان سے شیئر کی گئی ان کی ایک تصویر سوشل میڈیا پر بحث کا موضوع بن گئی ہے۔
تقریباً دو دہائیوں سے شوبز انڈسٹری سے وابستہ نعمان حبیب اپنے خاندان کے بہت قریب سمجھے جاتے ہیں۔ ان کی اہلیہ، والدہ اور بچے بھی مختلف ٹی وی پروگراموں میں ان کے ساتھ نظر آچکے ہیں۔ حال ہی میں والدہ کے انتقال کی افسوسناک خبر انہوں نے خود اپنے مداحوں کو سوشل میڈیا کے ذریعے دی تھی۔
اداکار نے بعد ازاں اپنی والدہ کی قبر پر حاضری کے دوران ایک تصویر شیئر کی جس میں وہ قبر کے قریب بیٹھے دکھائی دیے۔ تاہم سوشل میڈیا صارفین نے تصویر میں ایک ایسی بات دیکھ لی جس پر انہیں تنقید کا سامنا کرنا پڑا۔
تصویر میں نعمان حبیب بظاہر کسی دوسرے شخص کی قبر پر جوتوں سمیت بیٹھے ہوئے تھے۔ یہ منظر دیکھ کر متعدد صارفین نے ان کے اس عمل کو نامناسب قرار دیا اور قبروں کے احترام کا خیال رکھنے کی تلقین کی۔
ایک صارف نے لکھا کہ والدہ کی جدائی کا دکھ اپنی جگہ، لیکن دوسرے مرحوم افراد اور ان کے اہلِ خانہ کے جذبات کا احترام بھی ضروری ہے۔ ایک اور شخص نے جوتوں سمیت قبر پر بیٹھنے پر اعتراض کیا جبکہ بعض لوگوں نے سوشل میڈیا کے لیے ایسی تصویر لینے کے فیصلے پر بھی سوال اٹھایا۔
اگرچہ اداکار کی جانب سے یہ عمل دانستہ طور پر کیے جانے کا کوئی ثبوت نہیں اور ممکن ہے کہ وہ غم کی کیفیت میں اس بات پر توجہ نہ دے سکے ہوں، تاہم تصویر سامنے آنے کے بعد صارفین نے قبرستان کے آداب اور احترام سے متعلق اپنی رائے کا اظہار کیا۔
نعمان حبیب کی اس تصویر نے سوشل میڈیا پر ایک نئی بحث چھیڑ دی ہے جہاں ان کی والدہ کے انتقال پر افسوس کے ساتھ ساتھ قبرستان میں احتیاط اور دوسروں کی قبروں کے احترام کی اہمیت پر بھی بات کی جارہی ہے۔