برطانیہ نے سعودی عرب کے لیے نئے دفاعی مشن کا فیصلہ کیا ہے جس کے تحت رائل ایئر فورس کے لڑاکا طیارے سعودی عرب میں تعینات کیے جائیں گے۔
بلومبرگ کی رپورٹ کے مطابق برطانوی ٹائفون لڑاکا طیارے سعودی شہروں اور اہم تنصیبات کو حوثی حملوں سے محفوظ رکھنے میں مدد فراہم کریں گے۔ اس مشن کے دوران برطانیہ سعودی عرب کو اٹلس اے 400 ایم ٹرانسپورٹ طیارہ اور فوجی مشیر بھی مہیا کرے گا۔
اس سے قبل ستمبر میں بھی برطانیہ نے سعودی عرب کے لیے اضافی دفاعی فوجی امداد کا اعلان کیا تھا جس میں رائل ایئر فورس کا ووئیجر فضائی ایندھن بھرنے والا طیارہ شامل تھا، تاہم اس وقت لڑاکا طیاروں کی تعیناتی کا اعلان نہیں کیا گیا تھا۔
دوسری جانب یمنی حکام کے مطابق یمن کے صوبے شبوہ میں سرکاری سیکیورٹی فورسز کے تربیتی کیمپ پر حوثی ملیشیا کے حملے کے نتیجے میں ہلاکتوں کی تعداد بڑھ کر 58 ہوگئی ہے۔