ایران کی پاسدارانِ انقلاب کی بحریہ نے خلیج فارس اور آبنائے ہرمز میں 7 بحری جہازوں کو تباہ کرنے کا دعویٰ کیا ہے۔خبر رساں ادارے کے مطابق پاسدارانِ انقلاب کی بحریہ کا کہنا ہے کہ شمالی خلیج فارس میں تیل کی غیر قانونی ترسیل میں ملوث 4 بحری جہازوں کی نگرانی کے بعد انہیں بیک وقت نشانہ بنایا گیا۔
ایرانی بحریہ نے مزید دعویٰ کیا کہ 3 دیگر جہاز آبنائے ہرمز کے مغربی حصے میں بارودی سرنگوں سے ٹکرا گئے جس کے بعد ان میں آگ لگ گئی۔ تاہم ان واقعات میں متاثرہ جہازوں کی شناخت، جانی نقصان اور تباہی کی مکمل تفصیلات سامنے نہیں آئیں۔
ایران اور امریکا کے درمیان جنگ شروع ہونے کے بعد آبنائے ہرمز، خلیج فارس اور خلیج عمان میں بحری جہازوں پر حملوں میں اضافہ ہوا ہے۔ اطلاعات کے مطابق اب تک امریکی پرچم بردار جہاز سمیت 10 سے زیادہ بحری جہازوں کو نشانہ بنایا جا چکا ہے۔ حملوں میں تیل بردار ٹینکرز، کنٹینر جہازوں اور بلک کیریئرز کو نقصان پہنچا جبکہ بعض جہازوں میں آگ لگنے اور کچھ کے ڈوبنے کی اطلاعات بھی سامنے آئی ہیں۔
دوسری جانب ایران نے خبردار کیا ہے کہ اگر امریکی فوج کی جانب سے اشتعال انگیزی جاری رہی تو خطے میں امریکی فوجی اڈوں کے خلاف وسیع پیمانے پر کارروائی کی جا سکتی ہے۔
آبنائے ہرمز عالمی سطح پر تیل کی ترسیل کی اہم ترین گزرگاہوں میں شامل ہے۔ اس علاقے میں بحری جہازوں پر حملوں اور بڑھتی ہوئی کشیدگی سے عالمی توانائی کی سپلائی اور سمندری تجارت کو مزید خطرات لاحق ہونے کا خدشہ ہے۔