ایران کی پاسدارانِ انقلاب نے خبردار کیا ہے کہ ملک کے خلاف کسی بھی نوعیت کی محدود فوجی کارروائی کا جواب کئی گنا زیادہ شدت سے دیا جائے گا، جبکہ ایرانی مسلح افواج ہر قسم کی صورتحال سے نمٹنے کے لیے مکمل طور پر تیار ہیں۔
خبر رساں ادارے فارس کے مطابق پاسدارانِ انقلاب کے ترجمان حسین محبی نے اپنے بیان میں کہا کہ ایران کے خلاف ذرائع ابلاغ کے ذریعے دھمکی آمیز بیانات دیے جا رہے ہیں، تاہم دھمکیاں دینے والے موجودہ حالات میں کسی مؤثر فوجی کارروائی کی صلاحیت نہیں رکھتے۔
انہوں نے کہا کہ مخالفین بھی اس حقیقت سے آگاہ ہیں کہ وہ نہ تو ایران کے خلاف مؤثر کارروائی کر سکتے ہیں اور نہ ہی اپنے مطلوبہ مقاصد حاصل کرنے میں کامیاب ہوں گے۔
حسین محبی نے مزید خبردار کیا کہ ماضی کی فوجی کارروائیوں کو دہرانے کی صورت میں بھی مخالفین کو ناکامی کا سامنا کرنا پڑے گا۔ ان کے مطابق ایرانی مسلح افواج کی مکمل تیاری اور پہلے سے مرتب کردہ عملی منصوبوں کے باعث دشمن کی جانب سے کسی معمولی کارروائی کا جواب بھی کئی گنا زیادہ شدت سے دیا جائے گا۔
ایرانی پاسدارانِ انقلاب کے اس بیان کو ملک کے خلاف ممکنہ فوجی کارروائیوں کے تناظر میں سخت انتباہ قرار دیا جا رہا ہے۔