پاک بھارت میچز نہ ہونے سے عالمی ہاکی کو نقصان پہنچ رہا ہے: صدر ایف آئی ایچ طیب اکرام

image

انٹرنیشنل ہاکی فیڈریشن (ایف آئی ایچ) کے صدر طیب اکرام نے کہا ہے کہ پاکستان ہاکی فیڈریشن کو بھارت میں ہونے والی ایشین چیمپئنز ٹرافی کی میزبانی کے حوالے سے کم از کم سات ماہ قبل مطلع کر دیا گیا تھا۔

پاکستان کے دورے پر آئے ہوئے طیب اکرام نے لاہور میں میڈیا سے گفتگو کرتے ہوئے بتایا کہ انہوں نے ایشین چیمپئنز ٹرافی میں شرکت کے حوالے سے پاکستان ہاکی فیڈریشن سے بات چیت کی تھی جس میں ایشین ہاکی کنفیڈریشن بھی شامل تھی۔

انہوں نے کہا کہ ’’ہمیں امید تھی کہ پاکستان بھارت میں ہونے والے اس ایونٹ میں شرکت کرے گا، لیکن ہم اس پوزیشن میں نہیں ہیں کہ پاکستان یا بھارت کی فیڈریشنز ایک دوسرے کے ممالک میں جا کر کھیلنے سے متعلق جو فیصلے کرتی ہیں، ان پر اثر انداز ہو سکیں۔‘‘

90 کی دہائی اور اس کے بعد پی ایچ ایف کی حمایت سے ایف آئی ایچ کے عہدوں تک پہنچنے والے مکاؤ میں مقیم پاکستانی نژاد صدر نے کہا کہ انہوں نے پاکستان کا فیصلہ اس لیے قبول کیا کیونکہ اس کا تعلق بھارت میں کھیلنے کے حوالے سے ان کی حکومتی پالیسی سے تھا۔

ان کا کہنا تھا کہ ’’یہ ٹیم کے لیے قومی وقار کا معاملہ ہے، لیکن اس کے ساتھ ساتھ میرا یہ بھی ماننا ہے کہ جب پاکستان اور بھارت ایک دوسرے کے خلاف باقاعدگی سے نہیں کھیلتے تو اس سے عالمی ہاکی کو بہت نقصان پہنچتا ہے۔‘‘

طیب اکرام نے وضاحت کی کہ بھارت براڈکاسٹنگ اور اسپانسرشپ معاہدوں اور بین الاقوامی ٹورنامنٹس کی میزبانی کے لیے عالمی معیار کی سہولیات کی وجہ سے بین الاقوامی ایونٹس کا ایک بڑا مرکز بن چکا ہے۔

انہوں نے کہا کہ ’’یہی وجہ ہے کہ بہت سے بین الاقوامی اور ایشیائی ایونٹس بھارت میں منعقد ہو رہے ہیں۔‘‘

طیب اکرام نے کہا کہ یہ بھی ایک حقیقت ہے کہ اگر پاکستان اور بھارت کے درمیان ہاکی میچز باقاعدگی سے منعقد ہوں تو اس سے کھیل کی عالمی سطح پر ترقی اور مقبولیت میں اضافے میں مدد ملے گی۔

انہوں نے کہا کہ کرکٹ کی طرح جب بھی پاکستان اور بھارت نیوٹرل وینیوز پر بڑے ایونٹس میں آمنے سامنے آتے ہیں تو ٹیلی ویژن اور ڈیجیٹل میڈیا پر سب سے زیادہ ناظرین حاصل کرتے ہیں اور براڈکاسٹرز اور فیڈریشنز کو اسپانسرشپ کے بھی بہترین معاہدے ملتے ہیں۔

انہوں نے کہا کہ ’’پاکستان اور بھارت کے میچز عالمی ہاکی کے لیے انتہائی اہم ہیں۔ ان کی ناظرین کی تعداد (ویورشپ) دیگر تمام ہاکی میچوں سے کہیں زیادہ ہوتی ہے۔‘‘

طیب اکرام کا یہ بھی خیال تھا کہ جب بھی دونوں ممالک کے درمیان ہاکی کے معمول کے تعلقات رہے اور دو طرفہ سیریز کھیلی گئیں، تو اس سے دونوں ممالک میں کھیل کو فروغ ملا اور کھلاڑیوں کی صلاحیتوں میں بھی نکھار آیا۔ انہوں نے امید ظاہر کی کہ حالات جلد بہتر ہو جائیں گے۔

طیب اکرام نے بتایا کہ ایف آئی ایچ نے ملک میں کھیل کا وقار دوبارہ بلند کرنے کی کوشش کے تحت اگلے سال کے نیشنز کپ ایونٹ کی میزبانی پاکستان کو سونپی ہے۔

انہوں نے مزید کہا کہ ’’بین الاقوامی ٹورنامنٹس کھیل میں لوگوں کی دلچسپی بڑھانے میں مدد دیتے ہیں اور مجھے پورا یقین ہے کہ ایف آئی ایچ نیشنز کپ کا انعقاد ملک میں ہاکی کے ایک نئے دور کا آغاز ثابت ہوگا۔‘‘


Meta Urdu News: This news section is a part of the largest Urdu News aggregator that provides access to over 15 leading sources of Urdu News and search facility of archived news since 2008.

Follow US