بھارتی فلم انڈسٹری میں دیکھتے ہی دیکھتے شہرت کی بلندیوں پر پہنچنے والے اداکار نواز الدین صدیقی کا شمار اس وقت صف اول کے فنکاروں میں ہوتا ہے اور نوازالدین صدیقی بالی ووڈ میں کامیابیوں کے بعد اب ہالی ووڈ میں بھی صلاحیتوں کے جوہر دکھارہے ہیں۔
2000 میں فلمی دنیا میں قدم رکھنے والے نواز الدین صدیقی کا تعلق اتر پردیش کے ضلع مظفر نگر سے چالیس کلومیٹر دور واقع بھوانا گاؤں سے ہے۔
کاشتکاروں کے خاندان سے تعلق رکھنے والے نواز الدین صدیقی نے ایک غریب گھرانے میں پرورش پائی اور ہل چلانے کے ساتھ ساتھ انہوں نےدلی کے نیشنل اسکول آف ڈرامہ سے تربیت لینے کے علاوہ ایک فیکٹری میں بطور سیکورٹی گارڈ بھی کام کیا۔
نوازالدین نے ابتداء میں چھوٹے چھوٹے اور چند سکینڈز کے کرداروں سے فلموں میں جگہ بنائی لیکن آج 25 کروڑ کے عوض بھی چھوٹا کردار ادا کرنے کو تیار نہیں ہیں۔
ان کا کہنا ہے کہ انڈسٹری میں گزارے وقت کے دوران میں نے ایسی کئی فلموں میں کام کیا جہاں چھوٹے کردار ادا کیے اور اب یہ مکمل ہوگئے، اس لئے اب کوئی 25 کروڑ بھی دے تو بھی میں چھوٹا کردار نہیں کرونگا۔
نواز الدین کا کہنا ہے کہ میرا تعلق ایک غریب خاندان سے تھا، میں نے فلموں میں آنے کیلئے بہت محنت کی، میری ماں نے کہا تھاکہ کچرے کے ڈھیر کی بھی جگہ بدلتی ہے، تم تو پھر بھی انسان ہو، تمہارا بھی دن آئے گا اور ماں کی بات کو ہمیشہ یاد رکھا جس کی وجہ سے کڑی محنت اور کوششوں کے بعد آج میں اس مقام پر پہنچا ہوں۔