یورپی یونین کے آب و ہوا کے مانیٹر کوپرنیکس نے کہا ہے یہ سال 1.5 ڈگری سیلسیس سے زیادہ درجہ حرارت کے ساتھ ریکارڈ شدہ تاریخ میں سب سے زیادہ گرم ہوگا۔
اے ایف پی کے مطابق یورپی ایجنسی نے کہا کہ دنیا ریکارڈ درجہ حرارت کے ایک ’نئے سنگ میل‘ سے گزر رہی ہے۔سپین میں شدید سیلاب اور امریکہ میں سمندری طوفان ملٹن کے ساتھ یہ دوسرا گرم ترین اکتوبر تھا جس میں اوسط عالمی درجہ حرارت 2023 کی اسی مدت کے بعد دوسرے نمبر پر تھا۔کوپرنیکس نے کہا کہ 2024 ممکنہ طور پر 1850-1900 کی اوسط 1.55 ڈگری سیلسیس سے زیادہ ہو گا۔تاہم یہ پیرس معاہدے کی خلاف ورزی نہیں ہے جو گلوبل وارمنگ کو 2 ڈگری سیلسیس سے کم اور ترجیحی طور پر 1.5 ڈگری سیلسیس تک محدود کرنے کا کہتا ہے، کیونکہ اس کی پیمائش کئی دہائیوں میں ہوتی ہے نہ کہ انفرادی سالوں میں۔کوپرنیکس کلائمیٹ چینج سروس کی ڈپٹی ڈائریکٹر سمانتھا برجیس نے کہا کہ ’اب یہ یقینی ہے کہ 2024 ریکارڈ پر گرم ترین سال ہو گا اور صنعتی دور سے پہلے کی سطح 1.5 ڈگری سیلسیس سے زیادہ درجہ حرارت کا پہلا سال ہو گا۔‘’یہ عالمی درجہ حرارت کے ریکارڈ میں ایک نئے سنگ میل کی نشاندہی کرتا ہے اور آنے والی موسمیاتی تبدیلی کانفرنس کوپ 29 کے لیے اہم مسئلہ ہونا چاہیے۔‘سائنس دانوں کا کہنا ہے کہ محفوظ 1.5 سینٹی گریڈ کی حد تیزی سے پہنچ سے باہر ہوتی جا رہی ہے، جبکہ وہ اس بات پر بھی زور دیتے ہیں کہ درجہ حرارت میں اضافے کا ہر دسواں حصہ بتدریج مزید نقصان دہ اثرات مرتب کرتا ہے۔گزشتہ ماہ اقوام متحدہ نے کہا تھا کہ موسمیاتی تبدیلی کی موجودہ رفتار کے نتیجے میں اس صدی میں تباہ کن 3.1 ڈگری سیلسیس درجہ حرارت بڑھے گا، جب کہ تمام موجودہ آب و ہوا کے وعدے مکمل طور پر کیے گئے تب بھی 2.6 ڈگری سیلسیس درجہ حرارت ہو گا۔گلوبل وارمنگ صرف بڑھتے ہوئے درجہ حرارت کے بارے میں نہیں ہے، بلکہ فضا اور سمندروں میں موجود تمام اضافی گرمی بھی ایک مسئلہ ہے۔گرم ہوا زیادہ پانی کے بخارات کو روک سکتی ہے اور گرم سمندروں کا مطلب ہے کہ زیادہ بخارات بنتے ہیں جس کے نتیجے میں زیادہ شدید بارشیں اور طوفان آتے ہیں۔کوپرنیکس نے کہا کہ اکتوبر میں یورپ کے مختلف حصوں کے ساتھ ساتھ چین، امریکہ، برازیل اور آسٹریلیا کے کچھ حصوں میں اوسط سے زیادہ بارش ہوئی۔یورپی یونین کے مانیٹر نے مزید کہا کہ امریکہ کو بھی جاری خشک سالی کا سامنا ہے جس نے لوگوں کی ریکارڈ تعداد کو متاثر کیا۔