لڑکیوں کو اپنا رنگ گورا کرنے کی بڑی جلدی ہوتی ہے کیونکہ وہ چاہتی ہیں کہ کم وقت میں زیادہ حسین نظر آئیں اور اس کے لئے بیوٹی کریموں کے ساتھ فارمولا کریموں کا انتخاب کرتی ہیں اور بالآخر اس سے ان کی جلد خراب ہو جاتی ہے رنگ صاف وقتی طور پر تو ہو جاتا ہے بعد میں ان کی رنگت پھیکی پڑ جاتی ہے، اب اس کے لئے قدرتی ٹپس اور جڑی بوٹیوں کا استعمال سب سے زیادہ اچھا اور معیاری طریقہ ہے جن کا کوئی سائیڈ افکیٹ نہیں ہوتا، بے شک فائدہ دیر سے ہوتا ہے مگر کچھ وقت بعد نتائج بہت اچھے ہوتے ہیں۔ وومن کارنر میں ہمیشہ آپ کے لئے زبردست اور معیاری ٹپس بتائی جاتی ہیں اور آج بھی ہم آپ کو 5 ایسے اجزاء سے رنگ گورا کرنے کی ترکیب بتانے جا رہے ہیں جو سارا سال آپ کو فائدہ دیتی ہیں۔
ٹپس:
٭ پودینہ:
پودینہ میں سیلی سائیکلک ایسڈ پایا جاتا ہے جو کہ رنگ کو صاف کرنے کا کام کرتا ہے اور جلد کی صفائی بھی جلد از جلد کرتا ہے۔ پودینے کے پتوں میں دو چمچ پانی ڈال کر اس کو بلینڈ کرلیں اور اس پیسٹ کو چہرے پر لگائیں، دن میں جس وقت آپ آسانی سے 20 منٹ کے لئے لگا سکیں اور پھر خشک ہونے پر سادے پانی سے منہ دھو لیں۔ اس ٹپ کو روزانہ استعمال کریں رنگ جلدی ہی صاف ہو جائے گا۔
٭ ایلوویرا:
ایلوویرا میں وٹامن سی اور ای پایا جاتا ہے جس کی وجہ سے یہ ہماری جلد کو صاف کرنے کے لئے سب سے زیادہ مفید ہے اس لئے آپ روزانہ ایلوویرا جیل کو چہرے پر لگائیں اور 15 منٹ کے لئے چھوڑ دیں پھر چہرہ پانی سے دھو لیں۔ اس طرح سے بھی آپ کا رنگ جلدی ہی صاف ہو جائے گا۔
٭ گلاب کا عرق:
گلاب کا عرق ایک ایسا بیوٹی ٹانک ہے جس کو استعمال کرنے سے جلد نرم و ملائم بھی ہو جاتی ہے اور اس پر موجود داغ دھبے بھی صاف ہو جاتے ہیں۔ روزانہ گلاب کے عرق کو چہرے پر لگانے سے بھی رنگ نکھر جاتا ہے۔ یہ قدرتی ٹانر بھی ہے اور ایک اچھا موائسچرائزر بھی ہے۔
٭ گرین ٹی:
گرین ٹی میں موجود ایسکوربک ایسڈ جلد کا رنگ صاف کرنے کا کام کرتے ہیں۔ ایک چمچ گرین ٹی کو چار چمچ پانی میں بھگو دیں، اور پھر اس پانی کو چہرے پر روئی کی مدد سے لگائیں اس سے جلدی ہی رنگ صاف بھی ہو جائے گا اور ایکنی کے مسائل بھی کنٹرول ہو جائیں گے۔
٭ ہرا دھنیا:
ہرے دھنیے میں موجود کولیجن اور وٹامن سی رنگ صاف کرنے کا کام کرتے ہیں۔ تھوڑے سے ہرے دھنیے کی پتیوں کو پانی میں بھگو کر رکھ دیں، پھر اسی پانی میں ایک چمچ ہلدی مکس کرکے چہرے پر لیپ لگالیں اور خشک ہونے پر چہرہ دھو لیں۔ روزانہ اس ٹپ سے چہرہ جلدی صاف بھی ہو جائے گا اور ہرے دھنیے کی بھیگی ہوئی پتیوں کو کھانے سے آپ کی جلد کا اضافی آئل اور پسینہ کنٹرول میں آ جائے گا۔