ویکس یا تھریڈنگ کرنے کے بعد اکثر خواتین کی جلد کالی ہو جاتی ہے اس پر ویکس کے نشانات بھی پڑ جاتے ہیں اور جلد ہی وہ نشان جلد کے کالے ہونے کی ایک وجہ بنتے ہیں جس کی وجہ سے صاف ستھری، نرم و ملائم جلد کی خوبصورتی ماند پڑ جاتی ہے۔ اگر آپ کے ساتھ بھی یہ مسئلہ ہے تو جانیں 3 ایسی آسان ٹپس جن کے استعمال سے آپ کی جلد بھی صاف ہو جائے گی اور رنگت بھی نکھر جائے گی۔

٭ ہلدی:

ہلدی اینٹی آکسیڈنٹ ہوتی ہے جس میں وٹامن سی اور ای پایا جاتا ہے یہی وجہ ہے کہ ہلدی ہماری رنگت کو نکھارنے میں مدد دیتی ہے۔

ٹپ

ایک چمچ ہلدی اور ایک چمچ شہد کو اچھی طرح مکس کرلیں اور تھوڑا سا گلاب کا عرق شامل کر کے پیسٹ تیار کریں اور جس جگہ ویکس کیا ہے اس جلد پر لگا کر چھوڑ دیں، بیس منٹ بعد جب وہ خشک ہو جائے تو نیم گرم پانی سے دھو کر کپڑے سے صاف کرلیں۔ یہ ٹپ دو دن تک کریں اور پھر اگلی دفعہ ویکس یا تھریڈ کرنے کے بعد دوبارہ دو دن تک کریں اس سے جلد کالی نہیں ہوگی۔

٭ لیموں:

لیموں میں ایسٹک ایسڈ اور وٹامن سی پایا جاتا ہے جو اس مسئلے کو حل کرنے میں آپ کی مدد کرسکتا ہے۔

ٹپ

ایک لیموں کے رس کو دو چمچ دہی میں مکس کریں اور اس پیسٹ کو جلد پر لگا لیں، چونکہ دہی اینٹی آکسیڈنٹ ہے اور لیموں کے ساتھ مل کر یہ کالی جلد کو نکھارنے میں مدد دیتی ہے۔

٭ آلو:

آلو میں وٹامن سی، بی-6 اور سوڈیئم پایا جاتا ہے جو رنگ صاف کرنے اور جلد کے مردہ خلیات کو نکالنے کا کام کرتا ہے۔

ٹپ

ایک آلو کا رس نکا لیں اور اس کو جلد پر لگائیں خشک ہونے پر ایک روئی کی مدد سے صاف کریں اور تھوڑا سا پھٹکری کا پانی لگا کر خشک ہونے دیں، اس کے بعد نیم گرم پانی سے دھو لیں۔