“راہا بہت شرارتی ہے، باتونی ہے، اپنی ہی باتوں پر شرماتی ہے وہ خود میں خوش رہتی ہے اور یہی اسکی یونیک عادت ہے۔ یہ میرا بنیادی چیلنج رہا ہے کہ میں پرسنل اور پروفیشنل لائف میں توازن کیسے قائم کروں؟ جسے میں کسی نہ کسی طرح مینٹین کر لیتی ہوں لیکن کبھی کبھار ایسا کرنا مشکل بھی ہوجاتا ہے“
یہ کہنا ہے حال ہی میں معروف فیشن میگزین ‘ایلور‘ کو انٹرویو دینے والی اداکارہ عالیہ بھٹ کا جنھوں نے اپنی بیٹی اور نجی زندگی کے متعلق بھی کئی انکشافات کیے۔
اداکارہ عالیہ بھٹ کا کہنا تھا کہ ‘اس کی مثال کچھ یوں ہے کہ راہا کی ذمہ داریوں کی بدولت ‘می ٹائم‘ نہ ملنے کی وجہ سے میں نے پچھلے دو مہینوں سے اپنی تھراپی کا سیشن نہیں کروایا جس کی وجہ یہ ہے کہ مجھے شوٹنگ اور گھر کے معاملات دیکھنے کے باعث بلکل بھی وقت نہیں مل پارہا ہے کہ میں خود پر بھی تھوڑی توجہ دوں‘۔
اپنی گفتگو جاری رکھتے ہوئے عالیہ کا مزید کا کہنا تھا کہ ‘ورکنگ ویمن ہوکر چھوٹے بچے کو سنبھالنا ایک ٹاسک ہے جو کبھی کبھار بہت زیادہ مشکل ہوجاتا ہے لیکن جب آپ چیزیں مینیج کرنے میں کامیاب ہوجاتے ہوتو ایک طرح سے بہت خوش بھی ہوتے ہو جوکہ بہت ضروری ہے‘
اپنی صحت کے حوالے سے عالیہ نے انکشاف کیا کہ میں اے ڈی ایچ ڈی (اٹینشن ڈیفیسیٹ ہائپر ایکٹیویٹی ڈس آرڈر) میں مبتلا ہوں اور اسی وجہ سے، میں میک اپ سیٹ پر 45 منٹ سے زیادہ کا وقت نہیں دے سکتی۔ چونکہ میں اپنی بیماری کی وجہ سے میک اپ سیٹ پر زیادہ وقت نہیں گزار سکتی تو تقریبات میں سادہ رہنے کو ترجیح دیتی ہوں۔ اسی بیماری کی وجہ سے، میں اپنا ہر کام جلدی کرتی ہوں، میں چاہتی ہوں کہ میرے ساتھ کام کرنے والے لوگ بھی کسی بھی کام میں زیادہ وقت نہ لگائیں۔
عالیہ نے اس حوالے سے مزید بتایا کہ میری میک اپ آرٹسٹ نے شادی کے روز مجھے تیار کرنے کے لیے دو گھنٹے مانگے تھے اور باقاعدہ مجھ سے درخواست کی تھی لیکن میں نے یہ کہتے ہوئے انکار کردیا تھا کہ میں تمہیں ایک گھنٹے کا وقت بھی نہیں دے سکتی، میں سادہ میک اپ چاہتی ہوں۔
واضح رہے کہ اے ڈی ایچ ڈی (اٹینشن ڈیفیسیٹ ہائپر ایکٹیویٹی ڈس آرڈر) ایک ذہنی عارضہ ہے جس میں مبتلا افراد ضرورت سے زیادہ سرگرمیوں سے دور رہتے ہیں، توجہ دینے میں دشواری اور نتائج کی پرواہ کیے بغیر کام سرانجام دیتے ہیں۔