اداکارہ و ماڈل وینا ملک کے ہونے والے شوہر، شہریار چوہدری نے اپنے انسٹاگرام پر اس بات کا انکشاف کیا کہ انہوں نے اپنے سے بڑی عمر کی عورت کا انتخاب کیوں کیا۔ ان کا کہنا تھا، "خود سے بڑی عورت ہمیشہ ہی پرکشش رہی ہے۔ ان میں ایک میچورٹی ہوتی ہے اور رکھ رکھاؤ میں نزاکت ہوتی ہے۔"
شہریار نے مزید وضاحت کرتے ہوئے کہا کہ انہیں بڑی عمر کی عورت میں ایک خاص قسم کی خود اعتمادی اور پختگی نظر آتی ہے۔ "اس انتخاب کی ایک اور وجہ یہ بھی ہے کہ آپ ان سے لگی لپٹی کے بغیر ہر بات کر سکتے ہیں، انہیں کوئی خواب دکھانے کی ضرورت نہیں ہوتی،" انہوں نے مزید کہا۔ ان کے بقول، "بڑی عمر کی عورت اور کم عمر مرد کا جوڑ ایک مضبوط رشتہ بناتا ہے، خیالات متفق نہ بھی ہوں تو دونوں ایک دوسرے کو سمجھتے ہیں، جس سے زندگی پرسکون گزرتی ہے۔"
شہریار کا کہنا ہے کہ وہ وینا ملک سے جلد شادی کرنے والے ہیں اور ان کے ساتھ زندگی گزارنے کے فیصلے پر بہت خوش ہیں۔
یاد رہے کہ وینا ملک نے 2013 میں پہلی شادی کی تھی، تاہم 2017 میں طلاق کے بعد وہ کئی تنازعات کا شکار بھی رہیں۔ اب وہ جلد ہی شہریار چوہدری کے ساتھ نئی زندگی شروع کرنے کا ارادہ رکھتی ہیں، جس کے بارے میں وہ اپنے سوشل میڈیا پر بھی گاہے بگاہے شیئر کرتی رہتی ہیں۔