"ایک اشتہار کی شوٹنگ کے لیے بھارت جانا ہوا تھا، اور جس ہوٹل میں میں ٹھہری ہوئی تھی، وہیں سلمان خان کی بہن کی سالگرہ کی تقریب بھی منعقد ہورہی تھی۔ اس پارٹی میں کئی بالی ووڈ اسٹارز مدعو تھے، اور جب مجھے اس کا علم ہوا تو میں نے وہاں جانے کے لیے ہر ممکن کوشش کی۔ کئی لوگوں کی منتیں کرنی پڑیں، تب جا کر بڑی مشکل سے اجازت ملی۔"
یہ کہنا ہے معروف ماڈل اور اداکارہ نادیہ حسین کا جنھوں نے حال ہی میں تابش ہاشمی کے پروگرام ہنسنا منع ہے میں شرکت کی اور مختلف موضوعات پر گفتگو کی۔ نادیہ حسین کا کہنا تھا کہ یہ وہ وقت تھا جب سلمان خان اور کترینہ کیف کے درمیان مسائل سر اٹھا رہے تھے، جبکہ دوسری طرف دپیکا پڈوکون اور رنبیر کپور ایک دوسرے کی صحبت سے کافی خوش نظر آرہے تھے۔ ان کی باتوں سے اندازہ ہوتا تھا کہ ان کی محبت عروج پر تھی۔
اس تجربے کو یاد کرتے ہوئے نادیہ نے کہا کہ بالی ووڈ اسٹارز کی پارٹیاں بھی پاکستانی تقریبات کی طرح ہی ہوتی ہیں۔ پارٹی میں شامل ہو کر انہیں بہت خوشی ہوئی، اور ان کا کہنا تھا کہ کئی مشہور شخصیات کو قریب سے دیکھنے کا یہ ایک نادر موقع تھا۔