بھارتی سپر اسٹار کرکٹر ویرات کوہلی اور انکی اہلیہ اداکارہ انوشکا شرما نے اپنے دوسرے بچے کی پیدائش کا اعلان کردیا۔
دونوں کی جانب سے سوشل میڈیا پر ایک پوسٹ شیئر کی گئی جس کے بعد یہ خبر ہر طرف جنگل کی آگ کی طرح پھیل گئی۔
سوشل میڈیا پلیٹ فارم انسٹاگرام پر جوڑے کے مشترکہ بیان کے مطابق بچے کی پیدائش 15 فروری 2024 کو ہوئی تھی۔ انوشکا شرما اور ویرات کوہلی نے بتایا کہ انہوں نے اپنے بیٹے کا نام "اکائے" رکھا ہے۔
اپنی خوشی کا اظہار کرتے ہوئے انہوں نے لکھا کہ، "بے پناہ خوشی اور پیار سے بھرے دلوں کے ساتھ، ہم آپ کو یہ بتاتے ہوئے خوشی محسوس کر رہے ہیں کہ 15 فروری کو، ہم نے اپنے بیٹے آکائے، اور وامیکا کے چھوٹے بھائی کو اس دنیا میں خوش آمدید کہا ہے۔ ہم اپنی زندگی کے اس خوبصورت وقت میں آپ کی دعاؤں اور نیک خواہشات کے خواہاں ہیں۔ ہم آپ سے درخواست کرتے ہیں کہ اس وقت ہماری پرائیویسی کا احترام کریں۔"
اکائے نام کے معنی کیا ہیں؟
ویسے ابھی تک انوشکا اور ویرات نے نام کے ماخذ (معنی) کا اعلان نہیں کیا ہے، لیکن ہندی میں اکائے کا لفظی مطلب ہے "امر" یعنی ہمیشہ رہنے والا۔
اس سے پہلے بھی ویرات اور انوشکا نے بیٹی کا نام دیوی دُرگا کے نام پر 'وامیکا' اور اب بیٹے کا نام بھگوان شیو کے نام پر 'آکائے' رکھا۔ سنسکرت میں اکائے کا مطلب ہے جس کی کوئی قطعی شکل نہ ہو، جو بے شکل ہو۔ ہندو مذہب میں بھگوان شیو کو بے شکل سمجھا جاتا ہے۔