پاکستان اور بھارت میں فلموں کی کامیابی کیلئے آئٹم سانگ بھی لازمی بن چکے ہیں ،اداکار حمزہ علی عباسی نے فلموں میں آئٹم نمبر کی مخالفت کرتے ہوئے کہا ہے کہ کبھی آئٹم نمبر گانوں کی حمایت نہیں کروں گا ۔
اداکار حمزہ علی عباسی نے ایک پوڈ کاسٹ میں عام گانے اور آئٹم نمبر کے حوالے سے بات کرتے ہوئے کہا کہ میں آئٹم نمبرز کے حق میں نہیں ہوں، ایسے گانے جنسی طور پر اشتعال دلانے یا جنسی خواہشات کو بیدار کرنے والی شاعری اور مناظر پر مبنی ہوتے ہیں۔
انہوں نے کہا کہ گانے جس میں صرف رقص دکھایا جائے اور کوئی نیم عریاں اور بولڈ منظر نہ ہوں وہ عام گانے ہوتے ہیں جن کی مخالفت نہیں کرتے لیکن ایسے کسی بھی گانے کی حمایت کبھی نہیں کریں گے جو آئٹم نمبر ہو، بیہودہ شاعری اور مناظر پر مبنی ہو۔
حمزہ علی عباسی کے ساتھ اداکارہ ہانیہ عامر بھی موجود تھی اور انہوں نے بھی ساتھی فنکار کی بات سے اتفاق کیا اور کہا کہ ان مسائل پر کھل کر بات ہونے کی ضرورت ہے تاکہ فلمز میں بہتری لائے جائے۔
حمزہ علی عباسی نے کہا کہ یہ ہم خود کو جھوٹی تسلیاں دیتے ہیں کہ ایک ہاٹ ہوتا ہے، ایک ولگر ہوتا ہے یا ایک سیکسی ہوتا ہے۔ ایسا کچھ نہیں ہے یا تو ایک آئٹم نمبر ہوتا ہے یا عام گانے ہوتے ہیں ان کے بیچ کا کچھ نہیں ہوتا، دونوں میں فرق ہوتا ہے۔
واضح رہے کہ پاکستانی فلموں میں بھی آئٹم سانگ کے نام پربھارت کی طرز پر نامناسب رقص پیش کیا جاتا ہے جس کی ناصرف شائقین بلکہ فنکار بھی کھل کر مخالفت کرتے ہیں۔