پاکستانی ڈرامہ میرے ہمسفر آج کل ٹاپ ٹرینڈ میں ہے جس میں مرکزی کردار ہانیہ عامر اور فرحان دکھائی دے رہے ہیں ساتھ ہی اس میں سینئر اداکار وسیم عباس، صبا حمید، ثمینہ احمد اور تارہ محمود سمیت عمر شہزاد اور زویا ناصر بھی ہیں۔ اس ڈرامے کو اب تک لوگوں نے بہت زیادہ پسند کیا اور اس کی ہر قسط کے ساتھ جڑے رہے۔
اس ڈرامے میں ہانیہ عامر ایک ایسی لڑکی کا کردار پیش کر رہی ہیں جس کے والد اس کو بچپن میں دادی کے پاس چھوڑ جاتے ہیں اور پھر بچی کو دادی اپنے ساتھ رکھتی ہیں، لیکن چونکہ تائی جان ساتھ رہتی ہیں وہ اس پر ظلم و ستم کے پہاڑ گراتی رہتی ہیں، مگر پھر اس کی شادی تایا کے بیٹے حمزہ سے ہو جاتی ہے، کم و بیش یہ اس کہانی کا پس منظر ہے۔ لیکن اب ایک نیا موڑ آیا کہ دادی کا ہی انتقال ہوگیا۔
دادی کے انتقال پر گھر میں موجود اکثریت نے سفید رنگ کے لباس پہن رکھے ہیں جس سے یہ واضح ہو رہا ہے کہ جیسے میت کے گھر میں صرف سفید رنگ ہی پہنا جاتا ہو۔ اس سفید رنگ کے کپڑوں پر سوشل میڈیا صارفین نے خوب تنقید کی۔
کوئی اس کو ہندو ڈراموں اور رسم و رواج سے تشبیہہ دے رہا ہے تو کوئی یہ کہتا نظر آیا کہ جس گھر میں کوئی مر جائے تو کیا ان لوگوں کو یہ بھی خیال ہوگا کہ ارے سفید کپڑے نکال لو، یہ بالکل غلط طریقہ ہے اور کسی کتاب میں نہیں لکھا ہوا جبکہ کچھ لوگوں نے کہا کہ رنگوں سے جذبات یا حالات معلوم نہیں چلتے، دل میں احساس ہونا چاہیے۔