پاکستان میں طلاق کا رجحان بہت زیادہ بڑھتا جارہا ہے جس سے عام شہریوں کے ساتھ ساتھ شوبز ستارے بھی بری طرح متاثر ہورہے ہیں، اس حوالے سے بات کرتے ہوئے اداکارہ مومنہ اقبال شو کے دوران آبدیدہ ہوگئیں۔
مومنہ اقبال نے طلاق کے بارے میں بات کرتے ہوئے رو تے ہوئے کہا کہ مجھے بہت افسوس ہوتا ہے جب دو محبت کرنے والوں کو بچھڑتا ہوا دیکھتی ہوں، اس سے کوئی فرق نہیں پڑتا کہ وہ میرا اپنا ہے یا کوئی غیر ہے، یہ علیحدگی میرے گھر ہوئی یا کسی اور کے گھر، مجھے دکھ ہوتا ہے۔
معروف اداکارہ مومنہ اقبال نے ایک شو میں شرکت کی جہاں انہوں نے طلاق کے بڑھتے رجحان پر بات چیت کرتے ہوئے کہا کہ وہ چاہتی ہیں ان کا ہونے والا شوہر ان کے والد جیسا ہو۔
مومنہ اقبال نے کہا کہ میری خواہش ہے کہ میرے والد کو بھی ان کے جیسے ہی داماد ملیں جو اپنی اہلیہ یعنی میرا اسی طرح خیال رکھیں جس طرح وہ رکھتے ہیں کیونکہ آج کل طلاقوں کی شرح بہت بڑھ رہی ہے۔
انہوں نے ساتھی فنکاروں کے ساتھ دیگر لوگوں سے بھی درخواست کی کہ اگر آپ کی اپنے جیون ساتھی کے ساتھ بن نہیں رہی ہے تو بےشک الگ ہو جائیں لیکن علیحدگی کے بعد بھی اس رشتے کا لحاظ رکھنا چاہیے۔
مومنہ اقبال کا کہنا تھا کہ آج کل شوبز انڈسٹری میں بھی کافی طلاقیں اور بریک اپ دیکھنے میں آرہے ہیں ،انہوں نے علیحدگی اختیار کرنے والے جوڑوں سے درخواست کی کہ آپ کا بریک اپ ہو یا طلاقیں ہوں اسے سوشل میڈیا سے دور رکھیں، کیونکہ جب آپ ایک دوسرے کے بارے میں سوشل میڈیا پر آکر برا بھلا کہتے ہیں تو وہ لوگ بھی خاموش نہیں رہ سکتے جن کا ان سے کوئی تعلق نہیں ہوتا۔