"شادی سے پہلے صاحبہ سیٹ پر اپنے جوتے بھی خود نہیں پہنتی تھیں. ایک ملازم عورت ان کو لا کر جوتے پہناتی تھی اور واپس لے جا کر رکھتی تھی. ان کے ساتھ ایک ملازمہ، ایک ڈرائیور، ایک منیجر اور ایک گن مین ہوتا تھا"
یہ کہنا ہے پاکستان انڈسٹری کے نامور اداکار افضال احمد عرف ریمبو کا جنھوں نے ایک انٹرویو میں ماضی کی مشہور ہیروئین صاحبہ سے شادی کے متعلق گفتگو کی. اس انٹرویو میں صاحبہ بھی موجود تھیں.
ریمبو کا کہنا تھا کہ اپنی ساس نشو بیگم کی یہ بات مجھے بہت اچھی لگتی تھی کہ بیٹیاں گھر کے باہر کتنی بڑی شخصیات کیوں نہ ہوں گھر میں وہ سارے کام عام لڑکیوں کی طرح کرتی تھیں.
سسرال میں رہنے کے متعلق ریمبو نے بتایا کہ اگرچہ شادی کے وقت ان کے ماں باپ خوفزدہ تھے کہ صاحبہ اتنی بڑی ہیروئین ہیں وہ گاؤں کے سسرال والوں کے ساتھ کیسا رویہ رکھیں گی لیکن صاحبہ کی یہ خوبی تھی کہ وہ سسرال جا کر ان جیسی ہی ہوجاتی تھیں اور اس طرح انھوں نے سسرال میں سب کا دل جیت لیا. ریمبو نے بتایا کہ ان کی خالائیں بھی اب کہتی ہیں کہ ہم اتنی اچھی لڑکی گاؤں سے بھی نہیں لا سکتے تھے.
اس حوالے سے صاحبہ نے کہا کہ جب محبت کی شادی کرتے ہیں تو محبت کا مطلب ہے نبھانا. حالات جو بھی ہوں یہ سب بہت چھوٹی باتیں ہوجاتی ہیں سب سے زیادہ اہمیت محبت کی ہوتی ہے.