قومی کرکٹر شعیب ملک کے ساتھ شادی کے بندھن میں بندھنے والی معروف اداکارہ ثنا جاوید پر اسٹیڈیم میں تماشائیوں کی جانب سے آوازیں کسنے پر بعض سوشل میڈیا صارفین نے شدید غصے کا اظہار کیا ہے۔
اس حوالے سے کئی دن سے ویڈیو سوشل میڈیا پو وائرل ہو رہی ہے جس میں ثنا جاوید کو اسٹیڈیم میں بیٹھا دیکھا جاسکتا ہے جب وہ اپنے خاوند شعیب ملک کو بیٹنگ کرتا دیکھ رہی تھیں۔
وہیں ایک اور ویڈیو بھی وائرل ہوتی ہے جب ثنا جاوید اسٹیڈیم میں آ رہی ہوتی ہیں اور تماشائی انہیں دیکھ کر ثانیہ مرزا کے نام کی آوازیں کسنا شروع کرتے ہیں تب وہ ایک نظر لوگوں کی جانب دیکھ کر آگے بڑھ جاتی ہیں۔
جب یہ لمحات سوشل میڈیا کی زینت بنے تو صارفین نے اس عمل کو "بد تہذیبی" قرار دیا۔
سوشل میڈیا صارفین نے تماشائیوں کے اس عمل کی شدید مذمت کی اور اس پر افسوس کا بھی اظہار کیا جس کے بعد ثناء جاوید کا نام سوشل میڈیا پلیٹ فارم ایکس (سابق ٹوئٹر) پر ٹرینڈ کرنے لگا۔