دعا کی فضیلت،قبولیت کے اوقات ومقامات اورآداب

(M.Jehan Yaqoob, Karachi)
رمضان المبارک ایک بار پھر سایہ فگن ہے،عموماًافطاری کے وقت ہر گھر میں دعا کی ایک روحانی فضا دیکھنے میں آتی ہے،یہ وقت دعا کی
قبولیت کا بھی خاص وقت ہوتاہے۔ہمیں چاہیے کہ اﷲ تعالیٰ سے زیادہ سے زیادہ دعامانگیں،کہ اس سے اس کی رحمت جوش میں آتی ہے!

الحمدﷲ!رمضان المبارک ہم پر اپنی تمام تر رحمتوں،برکتوں اور مغفرت کے وعدوں کے ساتھ ایک بار پھر سایہ فگن ہے۔مسلمان اس مہینے کے ایک ایک لمحے کو قیمتی بنانے کی کوشش کرتے ہیں۔اس مہینے کی خاص عبادات میں دعا بھی ہے۔عموماًافطاری کے وقت ہر گھر میں دعا کی ایک روحانی فضا دیکھنے میں آتی ہے،کیوں کہ حدیث مبارکہ کے مطابق افطاری کا سامان سامنے رکھ کر دعا میں مشغول بندے کے حوالے سے اﷲ تعالیٰ فرشتوں پر فخر فرماتے ہیں،اسی طرح یہ وقت دعا کی قبولیت کا بھی خاص وقت ہوتاہے۔ہمیں چاہیے کہ اﷲ تعالیٰ سے زیادہ سے زیادہ دعامانگیں،کہ اِس سے اُس کی رحمت جوش میں آتی ہے۔

دعا کی فضیلت ۔ قر آن کریم کی روشنی میں:
دعا کے بارے میں قرآن مجید میں اﷲ تعالی نے متعدد جگہ ہدایت دی ہے، ان آیات مبارکہ سے دعا کی عظمت واضح ہوتی ہے۔ سورۃ البقرۃ ، آیت نمبر186 میں ارشاد باری تعالی ہے:وَإِذَا سَأَلَکَ عِبَادِیْ عَنِّیْ فَإِنِّیْ قَرِیْبٌ أُجِیْبُ دَعْوَۃَ الد َّاعِ إِذَا دَعَانِ فَلْیَسْتَجِیْبُواْ لِیْ وَلْیُؤْمِنُواْ بِیْ لَعَلَّہُمْ یَرْشُدُون
ترجمہ : اور(اے پیغمبر)جب تم سے میرے بندے میرے بارے میں دریافت کریں تو (کہہ دو کہ)میں تو(تمہارے) پاس ہوں، جب کوئی پکارنے والا مجھے پکارتا ہے تو میں اس کی دعا قبول کرتا ہوں تو ان کو چاہیے کہ میرے حکموں کو مانیں اور مجھ پر ایمان لائیں تاکہ نیک راستہ پائیں۔
قرآن مجید کی سورۂ ا عراف ،آیت نمبر55،56میں اﷲ تعالیٰ ارشاد فرما تا ہے۔:اُدْعُواْ رَبَّکُمْ تَضَرُّعاً وَخُفْیَۃً إِنَّہُ لاَ یُحِبُّ الْمُعْتَدِیْنَ (55) وَلاَ تُفْسِدُواْ فِیْ الأَرْضِ بَعْدَ إِصْلاَحِہَا وَادْعُوہُ خَوْفاً وَطَمَعاً إِنَّ رَحْمَتَ اللّہِ قَرِیْبٌ مِّنَ الْمُحْسِنِیْنَ(56)
ترجمہ: لوگو!اپنے پرور دگار سے عاجزی سے اور چپکے چپکے دعائیں مانگا کرو، وہ حد سے بڑھنے والوں کو دوست نہیں رکھتا۔ اور ملک میں اصلاح کے بعد خرابی نہ کرنا اور خداسے خوف کرتے ہوئے اور امید رکھ کر دعا ئیں مانگتے رہنا۔ کچھ شک نہیں کہ خدا کی رحمت نیکی کرنے والوں سے قریب ہے۔

دعا کی فضیلت۔ حدیث نبوی کی روشنی میں:
اﷲ کے پیارے نبی حضرت محمد صلی اﷲ علیہ وسلم نے دعاکی عظمت ، اس کی بر کتیں ، دعا کے آداب اور دعا کرنے کے بارے میں واضح ہدا یات دی ہیں ۔ایسی بے شمار احادیث ہیں، جن میں دعا کا ذکر ہے اور دعا کی اہمیت و فضیلت کو واضح کیا گیا ہے۔

حضرت عبداﷲ بن عمر رضی اﷲ عنہ سے روایت ہے کہ رسول اﷲ صلی اﷲ علیہ وسلم نے فر مایا: دعا کارآمد اور نفع مند ہوتی ہے اور ان حوادث میں بھی جو نازل ہوچکے ہیں اور ان میں بھی جو ابھی نازل نہیں ہوئے، پس اے خدا کے بندو! دعا کا اہتمام کرو۔ (جامع ترمذی)

ایک اور حدیث حضرت عبداﷲ بن مسعود رضی اﷲ عنہ سے مردی ہے کہ حضرت محمد صلی اﷲ علیہ وسلم نے ارشاد فرمایا: اﷲ سے اس کا فضل مانگو، کیونکہ اﷲ کو یہ بات محبوب ہے کہ اس کے بندے اس سے دعا کریں اور مانگیں۔اﷲ تعالی کے کرم سے امید رکھتے ہوئے اس بات کا انتظار کرنا کہ وہ بلا اور پریشانی کو اپنے کرم سے دور فر مائے گا اعلی درجہ کی عبادت ہے۔ (جامع ترمذی)

حضرت ابو ہریرہ رضی اﷲ عنہ سے روایت ہے آنحضرت صلی اﷲ علیہ و سلم نے ارشاد فرما یا: اﷲ کے یہاں کوئی چیز اور کوئی عمل دعا سے زیادہ عزیز نہیں ( تر مذی، سنن ابن ماجہ)

حدیث مبارکہ ہے کہ رسول اﷲ صلی اﷲ علیہ و سلم نے ارشاد فرمایا کہ :دعا مانگنا بعینہ عبادت کرنا ہے ۔ پھر آپ صلی اﷲ علیہ و سلم نے بطور دلیل قرآن کریم کی سورۂ المؤمن کی آیت نمبر60 کی تلاوت فرمائی:وقال ربّکم ادعونیٓ استجِب لَکم
تر جمہ: اور تمہارے پروردگار نے فرمادیا ہے کہ مجھ سے دعا مانگا کرومیں تمہا ری دعا قبول کروں گا۔(مسند احمد، جامع ترمذی، ابو داؤد، ابن ماجہ، النسائی)

حضرت انس رضی اﷲ عنہ کی روایت میں آپ صلی اﷲ علیہ و سلم نے ارشاد فرمایا دعا عبادت کا مغز اور جوہر ہے۔ (جامع ترمذی)

حضرت جابر رضی اﷲ عنہ سے روایت ہے کہ رسول اﷲ صلی اﷲ علیہ وسلم نے فر مایا :کیا میں تمہیں وہ عمل(نہ) بتاؤں جو تمہارے دشمنوں سے تمہارا بچا ؤکرے اور تمہیں بھر پور روزی دلائے ۔ وہ یہ ہے کہ اپنے اﷲ سے دعا کیا کرو ،رات میں اور دن میں، کیو نکہ دعا مؤمن کا خاص ہتھیار یعنی اس کی خاص طاقت ہے (بحوالہ معارف الحدیث،مولانا محمد منظور نعمانی ؒ)

کون سی دعانہیں مانگنی چاہیے ؟اور وہ کون سا عمل ہے،جو دعاکوبے اثر کردیتا ہے؟اس سلسلے میں چند احادیث ملاحظہ فرمائیں:
حضرت ابو ہریرہ رضی اﷲ عنہ سے روایت ہے کہ اﷲ کے رسول صلی اﷲ علیہ وسلم نے ارشاد فرمایا:تماری دعائیں اس وقت تک قابل قبول ہوتی ہیں جب تک کہ جلد بازی سے کام نہ لیا جائے۔ جلد بازی یہ ہے کہ بندہ کہنے لگے کہ میں نے دعا مانگی تھی مگر وہ قبول نہیں ہوئی۔

حضرت جابر رضی اﷲ عنہ سے روایت ہے کہ اﷲ کے رسول صلی اﷲ علیہ وسلم نے ارشاد فرمایا: تم کبھی اپنے حق میں یا اپنی اولاد اور مال و جائیداد کے حق میں بد دعا نہ کرو ،کہیں ایسا نہ ہوکہ وہ وقت دعا کی قبولیت کا ہو اور تمہاری وہ دعا اﷲ تعالی قبول فرمالے(جس کے نتیجے میں خود تم پر تمہاری اولاد یا مال و جائیداد پر کوئی آفت آجائے)( مسلم شریف)

حضرت ابو ہریرہ رضی اﷲ عنہ سے روایت ہے کہ اﷲ کے رسول صلی اﷲ علیہ وسلم نے ارشاد فرمایاکہ تم میں سے کوئی اپنی موت کی تمنانہ کرے،نہ جلدی موت آنے کے لیے اﷲ سے دعا کرے۔( مسلم شریف)

حضرت انس رضی اﷲ عنہ سے روایت ہے کہ اﷲ کے رسول اﷲ صلی اﷲ علیہ وسلم نے ارشاد فرمایاکہ تم لوگ موت کی دعا اور تمنا نہ کرو، اور کوئی آدمی ایسی دعا کے لیے مضطر ہو(اور کسی وجہ سے زندگی اس کے لیے دو بھر ہو)تو اﷲ کے حضور میں یوں عرض کرے:اے اﷲ! جب تک میرے لیے زندگی بہترہے مجھے زندہ رکھ، اور جب میرے لیے موت بہتر ہو تو دنیا سے مجھے اٹھا لے۔ (سنن نسائی)

دعا کے آداب
فقہائے کرام نے دعا مانگنے کے آداب میں درج ذیل اموربطورِ خاص بیان فرمائے ہیں:
(۱)کھانے، پینے ،پہننے اورکمانے میں حرام سے بچنا۔(۲)دعا مانگنے سے پہلے کوئی نیک کام مثلاً:صدقہ دینا ،یا نماز پڑھنا وغیرہ ،کرنا۔(۳)سختیوں اورمصیبتوں کے وقت خاص طور پر اپنے نیک اعمال کے واسطے دے دعا مانگنا ۔(۴)ناپاکی اورنجاست سے پاک ہونا۔(۴)باوضوہونا۔(۵)قبلہ رخ ہونا۔(۶) دعا سے پہلے اﷲ تعالیٰ کی حمد و ثناء کرنا،شروع اورآخر میں رسول اﷲ ﷺ پر درود و سلام بھیجنا۔(۷)دونوں ہاتھ پھیلاکراور اوپر اٹھاکر دعامانگنا۔(۸) عاجزی و انکساری اختیار کرنا۔(۹)گڑگڑانا۔(۱۰)ابنیائے کرام ؑ اوراﷲ کے نیک بندوں کے وسیلے سے دعا مانگنا۔

دعا کی قبولیت کے مخصوص اوقات اور مقامات
دعا اﷲ اور بندے کے درمیان ایک ایسا مخصو ص تعلق اورمنگتے اور اس کے خالق کے درمیان براہ راست را بطہ ہے، جس میں بندہ اپنے معبود سے اپنے دل کا حال سیدھے سادہ طریقے سے بیان کر دیتا ہے۔ بندہ اپنے پر ور دگا سے دن یا رات کے کسی بھی حصے میں د عا مانگ سکتا ہے، کوئی خاص وقت اس مقصد کے لیے مقرر نہیں ،تاہم احادیث مبارکہ سے دعا کے لیے درج ذیل خاص اوقات ثابت ہیں، ان وقتوں میں دعائیں بہت جلد قبول ہوتی ہیں :
(۱) رات کا آخری حصہ(یعنی پچھلی شب بیدار ہوکر نماز تہجد پڑھنے کے بعد کی دعا۔(۲) جمعہ کے دن میں بھی ایک قبولیت کی ساعت(گھڑی )ہے ، اس میں دعاقبول ہوتی ہے ۔(۳) شب قدرمیں مانگی جانے والی دعا۔() اذان کے وقت کی دعا۔(۴)فرض نمازوں کے بعدکی دعا۔(۵) سجدے کی حالت میں مانگی جانے والی دعا۔(۶)قرآن مجید کی تلاوت اور ختم قرآن کے وقت مانگی جانے والی دعا۔(۷) رمضان شریف کے مہینے میں فطارکے وقت کی دعا۔
اسی طرح دعا کے لیے مخصو ص مقا مات کی بھی کوئی قید نہیں،البتہ احادیث وآثار میں درج ذیل مقامات پر دعا ئیں قبول ہونے کی صراحت ہے:
(۱) بیت اﷲ کاطواف کرتے ہوئے۔(۲)مسجد نبوی صلی اﷲ علیہ و سلم میں(۳)ملتزم،یعنی وہ جگہ جو جو حجرا اسود اور خانہ کعبہ کے دروازے کے درمیان ہے،اس پر چمٹ کردعاکرنا۔(۴) میزاب رحمت کے نیچے ۔(۵) بیت المقدس میں۔(۶) رکن و مقام ابرہیم کے درمیان۔(۷) صفا و مروہ پر ۔(۸) مقامِ ابراہیم کے پیچھے۔(۹)اس جگہ، جہاں سعی کی جاتی ہے۔(۱۰) عرفات میں۔(۱۱)زمزم کا پانی پیتے وقت۔(۱۲)مشعرِحرام مزدلفہ میں۔(۱۳) رکنِ یمانی اور حجرِا سود کے درمیان۔(۱۴) جمرہ ٔصغریٰ اور جمرۂ وسطیٰ کے پاس کنکریاں مارنے کے بعد۔
اﷲ تعالیٰ ہمیں اِن آداب کی رعایت کرتے ہوئے،قبولیتِ دعا کے کامل یقین کے ساتھ،خوب دعائیں مانگنے کی توفیق عطا فرمائے۔آمین!

Comments Print Article Print
 PREVIOUS
NEXT 
About the Author: M Jehan Yaqoob

Read More Articles by M Jehan Yaqoob: 248 Articles with 172826 views »
Researrch scholar
Author Of Logic Books
Column Writer Of Daily,Weekly News Papers and Karachiupdates,Pakistanupdates Etc
.. View More
04 Jun, 2018 Views: 435

Comments

آپ کی رائے

مزہبی کالم نگاری میں لکھنے اور تبصرہ کرنے والے احباب سے گزارش ہے کہ دوسرے مسالک کا احترام کرتے ہوئے تنقیدی الفاظ اور تبصروں سے گریز فرمائیں - شکریہ