میرے آفس میں ایک معزز لیڈی ڈاکٹر تشریف لاٸیں ۔ پتہ چلا کہ وہ کراچی کے ایک بڑے مشہور ہاسپیٹل میں گاٸناکالاجسٹ ہیں ۔ کہنے لگیں سر آپ کی ایک تحریر صلہ رحمی پڑھنے کو ملی تو ارادہ کیا کہ جاکر اپنے دل کی بات آپ سے ضرور کرنی چاہیے ۔ میں نے کافی منگواٸی ۔ موباٸل خاموش کیا اور ہمہ تن گوش ہوکر بیٹھ گیا ۔
کہنے لگیں سر میرا تعلق ایک کھاتے پیتے گھرانے سے ہے ۔ کراچی کے بہترین رہاٸشی علاقے میں ایک ہی گلی میں میرے خاندان کے 7 بڑے بڑے گھر ہیں ۔ اگر ایک طرف سے شروع کروں تو ہر گھر میں صرف بزرگ رہتے ہیں اور کسی کی عمر بھی 65-70 سال سے کم نہیں ۔ ان گھروں میں میری 2 خالاٸیں ہیں ۔ 1 پھوپھی ہے اور دو گھر ماموٶں کے ہیں ۔ سب کی اولادیں پڑھی لکھی ہیں ۔ ڈاکٹرز انجنیٸرز اور آٸی ٹی والوں کی بھرمار ہے مگر سب کے سب والدین کو چھوڑ کر باہر جابسے ہیں ۔
پاکستان میں رہنے والوں میں سب سے چھوٹی میں ہوں ۔ میری عمر بھی 40 سال ہے اور میرا 15 سال کا ایک ہی بیٹا ہے ۔ میں اب 12 بزرگوں کی دیکھ بھال کرتی ہوں ۔ کسی کو بلڈ پریشر ہے ۔ کوٸی دل کا مریض ہے ۔کسی کو چلنے میں تکلیف ہے ۔ میں ہاسپیٹل میں کام صرف ڈیپریشن سے بچنے کیلیے کرتی ہوں ۔ پھوپھی کو دیکھنے جاٶں تو خالہ کا فون آتا ہے کہ مجھے بخار سا لگ رہا ہے جلدی آٶ ۔ ماموں کا بلڈ پریشر چیک کرنے جاتی ہوں تو بیٹا فون کرتا ہے کہ مما گھر کب آٶ گی ۔ بہت کوشش کے بعد بھی بزرگ اپنے گھر چھوڑ کر کسی ایک گھر میں اکٹھے رہنے تیار نہیں ہوتے ۔ گھروں میں نوکروں ڈراٸیوروں اور آیاٶں کی حکومت ہے ۔
میں پلکیں جھپکاٸے بغیر خاموش بیٹھا اسکی باتیں ایسے سن رہا تھا کہ کہیں کوٸی ایک لفظ بھی چوک نہ جاٸے ۔ میں نے پوچھا آپ کے میاں کہاں ہیں ۔ کہنے لگی ۔ وہ میرے لیے اللہ کا انعام ہیں ۔ میں جب بھی ان کی طرف دیکھتی ہوں دل میں بہت دعاٸیں دیتی ہوں کہ وہ اپنے والدین کی وفات کے بعد صرف میری وجہ سے اپنے امریکہ میں بسے سب بہن بھاٸیوں کے پاس نہیں جا رہے ۔ سوچتی ہوں کہ اگر میرے امی ابو زندہ ہوتے تو کیا میں اپنے اکلوتے بھاٸی اور 25-30 کزنز کی طرح اپنے والدین کو تنہا چھوڑ کر امریکہ کینیڈا جا بستی؟ سر میں خود ہی جواب گھڑتی رہتی ہوں کہ والدین کو تو چھوڑیں مجھے تو ان 6 گھروں میں رہنے والے خاندان کے بزرگوں نے بھی بیڑیاں ڈال رکھی ہیں
|