عیدِ قربان کے فضائل و مسائل

(Hafiz Kareem Ullah Chishti, Mianwali)
ارشادباری تعالیٰ ہے ۔فَصَلِّ لِرَبِّکَ وَانْحَرْ(ترجمہ) توتم اپنے رب کے لئے نمازپڑھواورقربانی کرو۔ سورۃ الکوثر
"عیدالا ضحی " نویدومسرت کادن ہے جسے تین دن تک منانے کاحکم دیاگیاہے۔دراصل ذوالحجہ کا مہینہ نہایت ہی عظمت اورمرتبے والامہینہ ہے۔ اس مہینہ کاچاندنظرآتے ہی ہردل میں اس عظیم الشان قربانی کی یادتازہ ہوجاتی ہے جسکی مثال تاریخ انسانی پیش کرنے سے قاصرہے ۔یہ مہینہ اس جلیل القدرپیغمبرکی یادگارہے جن کی زندگی قربانی کی عدیم المثال تصویرتھی یہ پیغمبر حضرت ابراہیم خلیل علیہ السّلام ہیں۔سال کے بعد10ذی الحجہ عیدالاضحی کے موقع پرمسلمانانِ عالم اپنے خالق ومالک کے ساتھ اظہارومحبت کرتے ہوئے اس کے نام پرجانورقربان کرتے ہیں اورسنت ابراہیمی کی یادتازہ کرتے ہیں ۔درحقیقت اس قربانی کااصل مقصدیہ ہے کہ مسلمان اﷲ پاک کی راہ میں اپنی عزیزترین متاع کی قربانی سے بھی دریغ نہ کریں اورہرامتحان میں ثابت قدم رہیں۔آقائے دوجہاں سرورکون ومکاںﷺکی حیات طیبہ اپنے جدامجدحضرت ابراہیم خلیل اﷲ ؑ اورحضرت اسماعیل ذبیح اﷲ ؑ کی طرح آزمائشوں اورامتحانوں میں ثابت قدمی سے عبارت ہے ۔امت مسلّمہ کے فردہونے کے ناطے ہمارایہ اوّلین فرض ہے کہ ہم میں سے ہرایک دین اسلام کی بلندی اورعروج کے لئے جان ودل سے کام کرے۔ حضرت سیدناابراہیم خلیل اﷲ ؑکی حیات مقدسہ میں حضرت اسماعیل ذبیح اﷲ ؑ کی قربانی کاواقعہ ایک ایساواقعہ ہے جس کی وجہ سے انہیں بارگاہ خداوندی سے شرف امامت بھی عطاکیاگیا۔باپ بیٹے نے تسلیم جاں کایہ اظہارصرف زبانی کلامی نہیں کیا،بلکہ عملاًحکمِ الٰہی کی بجاآوری کے لئے بیٹے کی قربانی کی غرض سے حضرت ابراہیم خلیل اﷲ ؑنے اپنے ہاتھ میں چھری بھی لے لی تھی۔لیکن حضرت اسماعیل ذبیح اﷲ ؑ کی زندگی محفوظ رہی کیونکہ ان کی نسل پاک سے جن کی خاطریہ بزم کونین سجائی گئی نبی آخرالزّماں حضرت محمدمصطفی ﷺکی ولادت باسعادت ہونی تھی ۔اﷲ رب العزت نے حضرت اسماعیل ؑ کے ذبح کوذبح عظیم کافدیہ قراردے دیا۔

قــــربـانی کی اہمیت :جس طرح اﷲ تعالیٰ نے اپنے بندوں کے لئے بعض عبادات کو مخصوص اوقات میں فرض کیا ہے اسی طرح قربانی بھی ایک اہم عبادت اورشعائر اسلام میں سے ہے ۔قربانی کے لئے شریعت کی طرف سے خاص دن مقرر ہیں ۔قربانی کے بیشمار فضائل آ پ ﷺ نے بیان فرمائے ہیں جن کا احاطہ تو ممکن نہیں البتہ اس اہم فریضہ کی ادائیگی کے موقع پر فضائل ومسائل قربانی کے حوالے سے چنداحادیث مبارکہ درج کی جارہی ہیں ۔ حضرت زیدبن ارقمؓ سے روایت ہے "رسول اﷲﷺ!کے اصحاب ؓ نے آپﷺسے عرض کیایارسول اﷲﷺیہ قربانیاں کیاہیں؟ رسول اﷲﷺ نے فرمایاتمہارے باپ حضرت ابراہیم خلیل اﷲ ؑ کی سنت ہے ۔صحابہ کرام علہیم الرضوان نے پوچھایارسول اﷲﷺہمارے لئے ان میں کیااجرہے؟ آپﷺ نے فرمایاہربال کے بدلے ایک نیکی ہے ۔صحابہ ؓ نے کہایارسول اﷲﷺاگرمینڈھاہوتو؟آپﷺنے فرمایاتب بھی ہربال کے بدلے میں ایک نیکی ملے گی(سنن ابن ماجہ ) ام المومنین سیدتناحضرت عائشۃ الصدیقہؓ سے مروی ہے کہ رسول اﷲﷺنے ارشادفرمایا قربانی کے دن انسان کاکوئی عمل اﷲ تعالیٰ کے نزدیک (مشروط)جانورکے خون بہانے سے زیادہ پسندیدہ نہیں ہے وہ ذبح شدہ جانورقیامت کے دن بالوں اورکھروں کے ساتھ آئے گابے شک قربانی کے جانورکاخون زمین پرگرنے سے پہلے اﷲ تعالیٰ کے دربارمیں مقام ِ قبولیت پرپہنچ جاتاہے پس قربانیوں کے بسبب دلی طورپرخوش ہوجاؤ۔(سنن ترمذی،ابن ماجہ )حضرت ام سلمہ ؓ فرماتی ہیں نبی کریمﷺنے ارشاد فرمایا"جوشخص قربانی کاارادہ رکھتاہو اوروہ ذی الحجہ کاچانددیکھ لے تودس تاریخ تک بال وغیرہ کوہاتھ نہ لگائے (سنن ابن ماجہ)حضرت ام سلمہ ؓ سے روایت ہے کہ نبی کریمﷺ نے ارشادفرمایاجوشخص تم میں سے ذی الحجہ کاچانددیکھے اوروہ قربانی کرناچاہتاہوتوذی الحجہ کی ۱۰تاریخ تک اپنے بال اورناخن نہ کاٹے ۔(سنن ابن ماجہ) حضرت ابن عباسؓ سے روایت ہے کہ نبی کریمﷺنے ارشادفرمایاکہ کوئی دن ایسانہیں کہ نیک عمل اس میں ان ایام عشرہ سے اﷲ تعالیٰ کے نزدیک زیادہ محبوب ہوصحابہ کرام علہیم الرضوان نے عرض کیایارسول اﷲ ﷺجہادفی سبیل اﷲ بھی نہیں آپﷺنے فرمایاجہادفی سبیل اﷲ بھی نہیں ۔مگروہ مردجواپنی جان اورمال لے کرنکلااوران میں سے کسی چیزکے ساتھ واپس نہ آیا۔(مشکوٰۃ)حضرت ابوہریرہؓ سے روایت ہے کہ نبی کریمﷺنے فرمایاکہ کوئی دن زیادہ محبوب نہیں اﷲ تعالیٰ کی طرف کہ ان میں عبادت کی جائے ذی الحج کے ان دس دنوں سے ان دنوں میں ایک دن کاروزہ سال کے روزوں کے برابرہے اوراسکی ایک رات کاقیام سال کی راتوں کے قیام کے برابرہے۔(غنیہ الطالبین۔مشکوٰۃ المصابیح)جوشخص ان دس ایام کی عزت کرتاہے اﷲ تعالیٰ یہ دس چیزیں اسکومرحمت فرماکراسکی عزت افزائی کرتاہے۔۱۔عمرمیں برکت ۲۔مال میں برکت۳۔اہل عیال کی حفاظت۴۔گناہوں کاکفارہ ۵۔نیکیوں میں اضافہ ۶۔موت کے وقت آسانی۷۔اندھیرے میں روشنی۸میزان میں سنگینی یعنی وزنی بنانا۹۔دوزخ کے طبقات سے نجات۱۰۔جنت کے درجات پرعروج۔

قـــــــــربانــــی کاثـــــــواب
امیرالمومنین حضرت علی المرتضیٰ شیرخداؓ سے روایت ہے کہ جوشخص قربانی کاجانورخریدنے کے لئے گھرسے نکلتاہے تواسے ہرقدم کے بدلے دس نیکیاں عطاکی جاتی ہیں اوراسکے دس گناہ مٹادایے جاتے ہیں اوراسکے دس درجے بلندکردیے جاتے ہیں۔جب وہ جانورکے مالک سے گفتگوکرتاہے اسکے نامہ اعمال میں تسبیح لکھی جاتی ہے اورجب وہ جانورخریدکراسکے مالک کوقیمت اداکرتاہے تواسے ہرایک درہم کے بدلے سات سونیکیاں دی جاتی ہیں اور جب اس جانورکوزمین پرذبح کرنے کے لئے لٹاتاہے تواس کے لئے زمینوں اورآسمانوں کی مخلوق استغفارکرتی ہے اور ذبح کے وقت اس جانورکاخون بہتاہے تواﷲ تعالیٰ اسکے خون کے ہرقطرے کے بدلے دس فرشتے پیداکرتاہے جوقیامت تک اسکی بخشش کے لئے دعائیں مانگتے رہیں گے۔جب اس جانورکاگوشت تقسیم کرتاہے تواسے ہرلقمہ کے بدلے حضرت اسماعیل ؑکی اولادسے ایک غلام آزادکرنے کاثواب ملتاہے۔ام المومنین سیدتناحضرت عائشۃ الصدیقہ ؓ سے روایت ہے کہ آقاﷺنے فرمایا یوم النحر( ۱۰ ذی الحج) کے دن بارگاہ الٰہی میں ابن آدم کے عمل میں سب سے پسندیدہ سخاوت قربانی کرناہے بے شک قیامت کے دن قربانی کاجانوربمعہ سینگوں بالوں اورکھروں کے آئے گا۔قربانی کے جانورکاخون زمین پرگرنے سے پہلے وہ جانوراﷲ تعالیٰ کی بارگاہ میں قبول ہوجاتاہے ۔فَطیبُوْابِھْانَفْسََا(پس خوشی سے قربانی کرو)۔مشکوٰۃ شریف

حضوراکرم نورمجسم ﷺنے ارشادفرمایاکہ حضرت داؤدعلیہ السلام نے اﷲ پاک کی بارگاہ میں سوال کیاکہ اے اﷲ جوآدمی حضرت محمدمصطفیﷺ کی امت سے قربانی کرے اس کاثواب کیاہے ۔جواب ملاکہ اس کاثواب یہ ہے کہ ہرایک بال کے عوض میں دس نیکیاں ملتی ہیں دس گناہ معاف ہوتے ہیں اوراس کے دس درجات بلندکردیے جاتے ہیں ۔حضرت داؤدعلیہ السلام نے عرض کیاکہ جب پیٹ پھاڑتے ہیں تواس وقت کس قدرثواب ملتاہے جواب ملاکہ جب وہ بندہ اپنی قبرسے اٹھتاہے تواس کاحشرایسی حالت میں ہوتاہے کہ اس کوبھو ک اورپیاس نہیں ہوتی اس سے بے پرواہ ہوتاہے اورقیامت کاخوف اس کے نزدیک نہیں چھوتااورفرمایااے داؤدؑ!جوشخص قربانی کرتاہے اس کوقربانی کے ہرایک ٹکڑے کے بدلے جنت میں ایک جانورعطاکیاجاتاہے جواونٹ کے برابرہوتاہے اورقربانی کے گوشت کے ایک ٹکڑے کے بدلے میں جنت کے گھوڑوں میں سے اس کوایک گھوڑامرحمت ہوتاہے اوراس کے بدن پرجتنے بال ہوتے ہیں اتنے ہی جنت میں اس کومحل ملتے ہیں اوراس کے ہربال کے برابراس کی خدمت کے واسطے ایک حورعطاکی جاتی ہے ۔اے داؤدؑ!تم کویہ معلوم نہیں ہے کہ قربانیاں قربانی کرنے والے لوگو ں کی سواریاں ہیں یہ گناہوں اور بلاؤں کودورکردیتی ہیں اس واسطے تُولوگوں کوقربانی کے واسطے حکم دے پس یہ قربانی مومنوں کاایساہی صدقہ ہے جیساکہ اسحق ذبیحہ صدقہ تھا۔(غنیۃ الطالبین) حضرت عبداﷲ ا بن عباسؓ سے روایت ہے کہ نبی کریمﷺنے فرمایاجوشخص خالص نیت سے راہ خدامیں جانورقربان کرتا ہے تواﷲ تعالیٰ اسکواس طرح اجردیتاہے جسکاعلم باری تعالیٰ کے سواکسی کونہیں البتہ قربانی کاادنیٰ ترین ثواب تویہ ہے کہ قربانی کے جانورکے خون کاقطرہ زمین پرگرنے کے بدلے پہلے قطرے کاثواب یہ ہے قربانی کرنے والے کوستردرجے دئیے جاتے ہیں دوسرے قطرے کے بدلے سترنیکیاں پاتاہے اور تیسرے قطرے پراسکے سترگناہ مٹادیئے جاتے ہیں چوتھے قطرے کے بدلے ثواب یہ ہے کہ قربانی کے وقت جوتکبیراﷲ اکبرپڑھی جاتی ہے اﷲ تعالیٰ کے نزدیک خوشبوئے مشک سے زیادہ خوشبودارہوتی ہے پانچویں قطرے پراسکے جسم اورزبان کے گناہوں سے یوں پاک کردیاجاتاہے جیسے ابھی ماں کے پیٹ سے پیداہواہوچھٹے قطرے پراس کے لئے بہشت میں اس کے لئے ایک شہرتیارکیاجاتاہے ساتویں قطرے پرروزمحشر سرداری کے لئے چناجاتا ہے یہ سرداری مخلوقات کی سرداری ہوگی آٹھویں قطرے پراسکواسکے والدین اوراہل خانہ کوبخش دیاجاتاہے نویں قطرے پراسکے اوردوزخ کے درمیان پانچ سوبرس کی مسافت کے برابرایک خندق حائل کردی جاتی ہے دسویں قطرے کے بدلے اسکانامہ اعمال اس کے دائیں ہاتھ میں دیاجائے گا گیارہویں قطرے پراسکی نمازیں اورنیک دعائیں قبول ہونگی بارھویں قطرے پراسکے لئے آتش دوزخ سے رہائی لکھ دی جاتی ہے تیرھویں قطرے پراسکوسترہزار حوریں دی جائیں گی چودھویں قطرے پراسکے نامہ اعمال میں ستررسولوں کاثواب لکھ دیاجاتاہے پندرہویں قطرے پر مرض الموت میں عزرائیل ؑاسکو رحمت وبخشش کی نوید مسرت سناتے ہیں سولہویں قطرہ پراسکی موت کی سختی کم ہوجائے گی سترہویں قطرے پراسکو طوق وزنجیرسے آزادکیاجائے گا، اٹھارہویں قطرے پرستر غلام آزادکرنے کاثواب ملے گاانیسویں قطرے پراسکوروزِمحشرایک براق دیاجائے گاجس پروہ سوارہوکرپُل صراط سے بجلی کی طرح گزرکرجنت میں داخل ہوگابیسویں قطرے پرروزمحشرحساب وکتاب میں اس پررحمت الٰہی کا نزول ہوگااکیسویں قطرے پراسکے گناہ معاف کردیے جاتے ہیں بائیسویں قطرے پراﷲ تعالیٰ اسکوروزمحشراپنے عرش کے سایہ میں جگہ دے گا جس روزعرش الٰہی کے سواکوئی سایہ نہ ہوگا۔ہرقطرے پریہ ثواب بڑھتاچلاجاتا ہے جسکاشماراﷲ رب العزت کے سواکسی کومعلوم نہیں پھرجب ذبح سے فارغ ہوجاتاہے تواﷲ پاک اسکی نگاہوں کے سامنے ایک جگمگاتاہوانورپیش کرتا ہے جب بھنے ہوئے گوشت کی بوٹی کھاتاہے تواﷲ پاک اسکی قبرکوروشن فرماتاہے۔اسکی قبرکواتنافراخ کرتاہے جس قدرکہ ستربرس کی راہ ہوتی ہے جب محتاجوں کوگوشت دینے کے لئے لے جاتاہے تواسکوپہلاقدم اٹھانے پرسفرحج کاثواب ملتاہے دوسرے قدم پراسکی عمراوررزق میں برکت ہوتی ہے تیسرے قدم پراسکے نامہ اعمال میں کوہ ابوقیس کے برابرثواب لکھ دیاجاتاہے چوتھے قدم پراسکی آنکھوں میں حضرت عثمان ذوالنورینؓ کی مانندحیاپیدا ہوتی ہے پانچویں قدم پراسکاقلب نرم ہوتاہے چھٹے قدم پراﷲ تعالیٰ اسکوفرزندصالح عطافرمائیں گے جوقیامت میں اسکاشفیع ہوگاساتویں قدم پراسکی قبر آسمان کی چوڑائی کے برابرفراخ کردی جائیگی۔اوراسطرح ہرقدم پرثواب بڑھتاچلاجاتاہے اوراس قدربڑھے گاکہ جسکاعلم سوائے اﷲ رب العزت کے کسی کوبھی نہیں ۔پھرجب اپنے بال بچوں کے ساتھ بیٹھ کرقربانی کاگوشت کھاتاہے توپہلے لقمہ پراسکوسترنبیوں کاثواب ملتاہے۔دوسرے لقمہ پر سترحج کاثواب تیسرے لقمہ پرسترنمازیوں کاثواب اورچوتھے لقمہ پرراہِ خدامیں سترگھوڑے صدقہ کرنے کاثواب ملتاہے پانچویں لقمہ پراﷲ تعالیٰ اسکوایمان کامل نصیب فرمائیں گے چھٹے لقمہ پراسکی قبرمیں ایک کھڑکی کھل جائے گی جوقیامت تک روشنی کاباعث ہوگی اسی طرح ہرلقمہ پرثواب بڑھتاچلاجاتاہے جوشخص قربانی کے گوشت میں سے کسی کوکھلائے گاتوسترشہیدوں کاثواب پائے گا، اورموت کے وقت فرشتہ اسکوبشارت سنائے گاکہ اے شخص اﷲ تعالیٰ نے تجھے عذاب سے بالکل آزادکردیاہے.(تذکرۃ الواعظین)

مــا لـــد ا رکـــے لئے و عید
حضرت ابوہریرؓہ سے روایت ہے کہ نبی کریمﷺنے فرمایاجوقربانی کرنے کی طاقت رکھتاہوپھروہ قربانی نہ کرے تووہ ہمارے مصلی کے پاس نہ آئے۔محمدابن سیرین ؒ سے روایت ہے کہ میں نے حضرت عبداﷲ بن عمرؓ سے پوچھاکیاقربانی واجب ہے انہوں نے فرمایارسول اﷲﷺنے قربانی کی اور آپ ﷺ کے صحابہؓ نے بھی کی اوریہ سنت جاری ہے۔(سنن ابن ماجہ)

مســـا ئل قــــــــــر بــــا نـــی
حضرت ابن عباس ؓ سے روایت ہے کہ آپﷺ نے رات میں قربانی کرنے سے منع فرمایا۔(طبرانی)حضرت عبیدبن فیروزسے روایت ہے کہ میں نے حضرت براء بن عازب ؓ سے پوچھامجھے بتائیے کہ کون سی قربانی ناپسندیدہ ہے اورکس قربانی سے رسول اﷲﷺنے منع فرمایاہے ۔ رسول اﷲ ﷺ نے اپنے ہاتھ مبارک سے اشارہ کیااورفرمایاچارقسم کے جانورقربانی کے لئے درست نہیں اوّل کاناجس کاکاناپن صاف ظاہرہو دوم جوبیمارظاہرہو،سوم جس کالنگڑاپن ظاہرہو،چہارم جواتناکمزورہوکہ اس کی ہڈیوں پرگوشت نظرنہ آئے عبیدؓ کہتے ہیں میں نے کہامجھے تووہ بھی برامعلوم ہوتاہے جس کے کان میں نقص ہوحضرت براء بن عازب ؓ نے فرمایاتم جسے براسمجھتے ہوتونہ خریدولیکن دوسروں کونہ منع کرو۔ امیرالمومنین حضرت علی المرتضی شیرخداؓ سے روایت ہے کہ آپ ﷺنے کان کٹے ہوئے اورسینگ ٹوٹے ہوئے جانورکی قربانی سے منع فرمایاہے ۔ (سنن ابن ماجہ)٭قربانی ہر اس شخص پر واجب ہے جو مسلمان ،عاقل ،بالغ ،مقیم ہو اور اس کی ملکیت میں ساڑھے باون تولے چاندی یاساڑھے سات تولہ سونایاان میں سے کسی ایک کی قیمت کے برابرسامان تجارت یاکسی سامان یاروپوں کامالک ہواوریہ مملوکہ چیزیں حاجت اصلیہ سے زائدہوں٭قربانی واجب ہونے کے لئے مذکورہ نصاب پرسال کا گزرنا ضروری نہیں قربانی کے تین دنوں میں جس کے پاس مذکورہ نصاب ہو اس پر قربانی واجب ہے ٭گھر میں جتنے افراد صاحب نصاب ہوں سب پر الگ الگ قربانی کرنا واجب ہے البتہ نابالغ اورمجنوں (پاگل )پر قربانی واجب نہیں اگرچہ وہ صاحب نصاب ہی ہوں ٭غریب شخص جس پر قربانی واجب نہ تھی اگر اس نے قربانی کی نیت سے کوئی جانور خرید لیا تو اس جانور کی قربانی واجب ہے ٭گائے ،بیل ،بھینس اوربھینسے کی عمر کم از کم دوسال ہونا ضروری ہے اونٹ اوراونٹنی کی عمر کم ازکم پانچ سال ہونا ضروری ہے اورباقی جانوروں کی عمر کم ازکم ایک سال ہونا ضروری ہے ۔البتہ بھیڑ،یا دنبہ اگر سال سے کم ہو لیکن اتنا موٹا تازہ ہو کہ سال بھر کے جانوروں میں چھوڑدیا جائے تو فرق محسوس نہ ہویعنی دیکھنے میں سال بھر کا معلوم ہوتو اس کی قربانی بھی جائز ہے بشرطیکہ چھ ماہ سے کم کا نہ ہو اگر جانور فروخت کرنے والاپوری عمر بتاتا ہے اورظاہر ی حالات اس کے بیان کی تکذیب نہیں کرتے تو اس پر اعتماد کرنا جائزہے۔ ٭قربانی کاجانورموٹاتازہ اوربے عیب ہوناچاہیے اگرتھوڑا ساعیب ہوتوقربانی مکروہ ہوگی زیادہ عیب والے جانورپرقربانی نہ ہوگی٭قربانی کے گوشت کے تین حصے کرے ایک حصہ صدقہ ایک حصہ احباب میں تقسیم کرے اورایک حصہ اپنے لئے رکھ لے٭جس کے دانت نہ ہوں یاجس کے تھن کٹے ہوں یاخشک ہوں اس کی قربانی ناجائزہے بکری میں ایک تھن کاخشک ہوناناجائزہونے کے لئے کافی ہے اورگائے اوربھینس میں دوتھن خشک ہوں توناجائزہے جس کی ناک کٹی ہویاعلاج کے ذریعہ اس کادودھ خشک کردیاہواورخنثیٰ جانوریعنی جس میں نرومادہ دنوں کی علامتیں ہوں اورجوصرف غلیظ کھاتاہوان سب کی قربانی ناجائزہے ۔بھیڑیادنبہ کی اون کاٹ لی گئی ہواس کی قربانی جائزہے اورجس جانورکاایک پاؤں کاٹ لیاگیاہو اس کی قربانی ناجائزہے ۔

قــــــــــربـانـــــی کــــی کھـــا لـیــں
حضرت علی المرتضیٰ شیرخداؓ سے روایت ہے کہ رسول اﷲﷺنے مجھے قربانی کی ہرچیزبانٹنے کاحکم دیاچاہے گوشت ہویاکھال یاجھول سب غریبوں میں بانٹ دی جائے۔(سنن ابن ماجہ)قربانی کی کھال کو اپنے استعمال میں لانا مثلاً مصلیٰ بنانا ،چمڑے کی کوئی چیز بنالینا جائز ہے اگر کھال کو فروخت کردیا جائے تو اس کی قیمت استعمال میں لانا جائز نہیں ہے بلکہ فقراء ومساکین پر اس کی قیمت کا صدقہ کرنا واجب ہے۔ قربانی کی کھال کسی خدمت کے معاوضے میں دینا جائز نہیں ۔امام مسجداگرغریب ہے توبطوراعانت اسے بھی کھال دے سکتے ہیں۔ قربانی کی کھالوں کے بہترین مصارف مدارس اسلامیہ میں دینی تعلیم حاصل کرنے والے مستحق طلباء طالبات ہیں ۔مدارس اسلامیہ کوقربانی کی کھال دینے میں صدقہ کا ثواب بھی ہے اوراحیائے علم دین میں تعاون بھی تواس لئے میں آپ سے اپیل کرتاہوں کہ قربانی کی کھالیں مذہب حق اہلسنت والجماعت کے تمام مدار س میں جمع کرائیں ۔تاکہ تعلیم ،صحت،اورفلاح عام کے اجتماعی عظیم منصوبہ جات پایہ تکمیل کوپہنچ سکیں۔

عید الاضحی:عید الاضحی کے دن صبح سویر ے اٹھنا ،غسل ومسواک ،نئے یا دھلے ہوئے کپڑے پہننا ،خوشبولگانا، صبح کی نمازاپنے محلہ کی مسجدمیں اداکرنا،عیدکی نماز سے پہلے کچھ نہ کھانا،عیدگاہ کی طرف پیدل چل کرایک راستے سے جانااوردوسرے راستے سے واپس آنا،نماز عید پڑھنے کے لئے جاتے ہوئے تکبیر تشریق بلند آواز سے پڑھنا مسنون ہے ۔عیدکی نمازکے لئے خطبہ سنت ہے خطبہ نمازکے بعدہوگا،عیدکی نمازکسی بڑے میدان میں اداکرناسنت ہے لیکن بڑے شہریااس جگہ جہاں زیادہ آبادی ہوایک سے زائدمقامات پرعیدین کے اجتماع بھی درست ہیں اورمیدان کی بھی شرط نہیں بڑی مساجدمیں بھی یہ اجتماع صحیح ہیں جیساکہ آج کل ہورہاہے اس کی اہم وجہ یہ ہے کہ اگرکسی ایک جگہ اجتماع ہوگاتوبہت سے لوگ نمازعیدسے محروم رہ جائیں گے کچھ توحقیقی مشکلات کی وجہ سے اورکچھ اپنی سستی کے باعث۔اﷲ پاک سے دعاگوہوں کہ اﷲ رب العزت ہماری تمام جانی و مالی عبادات کواپنے حبیب کریمﷺکے صدقے اپنی بارگاہ میں قبول فرماکرہمارے لئے ذریعہ نجات بنائے ۔ملک پاکستان کوامن وسلامتی کاگہوارہ بنائے۔آقائے دوجہاں سرورکون ومکاںﷺکی بروزقیامت شفاعت نصیب فرمائے ۔ مسلمانوں کوآپس میں اتفاق واتحاد نصیب فرمائے ۔اﷲ رب العزت عالمِ اسلام اورملک پاکستان کی خیرفرمائے۔مالک کائنات ارض وسماوات آقائے دوجہاں سرورکون ومکاںﷺ کی سچی اورپکی غلامی نصیب فرمائے۔ کفار و مشرکین، منافقین، حاسدین کامنہ کالافرمائے ۔ حضورﷺکے غلاموں کادونوں جہانوں میں بول بالافرمائے ۔آمین بجاہ النبی الامین
Comments
Print
16 Sep, 2016
Views: 940
Hafiz kareem ullah Chishti
About the Author: Hafiz kareem ullah Chishti Read More Articles by Hafiz kareem ullah Chishti: 179 Articles with 295913 views Currently, no details found about the author. If you are the author of this Article, Please update or create your Profile here.
Add Your Article
Article Categories
Politics سیاست Society & Culture معاشرہ اور ثقافت Religion مذہب Other/Miscellaneous متفرق Literature & Humor ادب و مزاح Education تعلیم Health صحت Famous Personalities مشہور شخصیات Science & Technology سائنس / ٹیکنالوجی Novel افسانہ Sports کھیل True Stories سچی کہانیاں Books Intro تعارفِ کتب Travel & Tourism سیر و سیاحت Career کیریر Entertainment انٹرٹینمنٹ Kids Corner بچوں کی دنیا Poetry شعر و شاعری 100 Lafzon Ke Kahani سو لفظوں کی کہانی Young Writers نوجوان قلم کار Arts ہنر Military Democracy سول فوجی جمہوریت Hamariweb Writers Club ہماری ویب رائٹرز کلب Step By Step
Recent Religion Articles
A Great hadith revealing the immense reward about purification, saying alhamdo lillah, subhanallah, and reciting the holy Quran.
من و سلوی کیا ہے ؟
میانہ روی سے رشتے جوڑیں
قاسم عشق مصطفیٰ ﷺ
View all Religion Articles
Most Viewed (Last 30 Days | All Time)