ممی ڈیڈی اداکار کہنے پر ریحام خان کو مشی خان نے گزشتہ روز خوب سنائی جس کا جواب دیتے ہوئے ریحام خان نے اب انہیں کہا ہے کہ یہ وہی ہے نا عمران کی دوست، جسے میں نے اپنی فلم جانان میں پھپھو کا کردار دیا تھا؟

یاد رہے کہ فلم جانان 2016 میں ریلیز ہوئی تھی جس میں مرکزی کردار علی رحمان خان، ارمینا رانا خان اور بلال اشرف نے نبھائے تھے جبکہ فلم میں مشی خان کا نام شیریں گل تھا اور ریحام خان فلم کی پورڈیوسر تھیں مزید یہ کہ ان کے علاوہ اداکارہ حریم فاروق اور عمران رضا کاظمی بھی فلم کے پروڈیوسر تھے۔

مشی خان کی تنقید:

ریحام خان جوکہ عمران خان کی سابقہ اہلیہ ہیں یہ اکثر خان صاحب کی سابقہ حکومت پر یہ تنقید کے تیر چلاتی رہتی ہیں۔ بہر حال اب ان کے ایک بیان پر مشہور و معروف اداکارہ مشی خان نے کہا ہے کہ آپ کا بیان پڑھا جس میں آپ نے کہا کہ یہ ممی ڈیڈی اداکار عمران حکومت جانے پر احتجاج کر رہے ہیں تو یہی احتجاج یہ کشمیر کیلئے کرتے تو کیا ہی بات تھی۔

اس بات پر سوشل میڈیا پر گردش کرتے ایک بیان میں مشی خان کا کہنا ہے کہ تو آپ کر لیتی، آپ کس بات کا انتظار کر رہی تھیں، آپ ہمیشہ ہمیں بتانے میں ہی مصروف رہتی ہیں لیکن آپ تو بی بی سی پر موسم کی خبریں دینے میں مصروف تھیں اور ویسٹرن طرز کی زندگی گزار رہی تھیں مگر اب پاکستان آ گئیں ہیں، سر پر دوپٹا لے لیا تو اب آپکو کشمیر یاد آ گیا ہے۔

مزید یہ کہ اس ویڈیو کو اب تک سوشل میڈیا پر 5 ہزار سے زائد لوگ دیکھ چکے ہیں جبکہ ڈیڑھ ہزار لوگوں نے اس ویڈیو پر اپنی پسندیدگی کا اظہار بھی کیا ہے۔