آج کل سوشل میڈیا پر کچھ بھی وائرل ہونے میں دیر نہیں لگتی۔ جیسا کہ اس وقت سماجی رابطوں کی ویب سائٹس پر پاکستانی اداکاراؤں سے متعلق پروپیگنڈا کر کے ان کی کردار کشی کی جا رہی ہے جس پر ان کا سخت رد عمل سامنے آیا ہے۔
اداکاراؤں پر جھوٹے الزامات کی بوچھاڑ ان کی طبعیت پر گراں گزری اور ایک کے بعد ایک سب ہی نے جواب دیا۔
سوشل میڈیا پر ایک شخص کی جانب سے مشہور اداکاراؤں جن میں سجل علی، کبریٰ خان، ماہرہ خان اور مہوش حیات پر جھوٹا الزام لگایا گیا کہ ان کی نازیبا ویڈیوز سوشل میڈیا پر موجود ہیں۔
اپنے ویلاگ میں اس شخص نے اداکاراؤں کے پورے نام لیے بغیر صرف ان کے نام کے شروع اور آخر کے حروف بتائے جس کے بعد یہ ویڈیو سوشل میڈیا پر آگ کی طرح پھیل گئی۔ سوشل میڈیا صارفین کی جانب سے ویلاگر کو تنقید کا نشانہ بنایا جا رہا ہے کہ بنا کسی ثبوت کے آپ ان اداکاراؤں پر کیسے بے بنیاد الزامات کیسے لگا سکتے ہیں؟
ویڈیو بنانے والے شخص کو اداکاراؤں کی جانب سے وارننگ جاری کی گئی ہے اور اس کے الزامات پر شدید رد عمل کا اظہا کیا۔
اداکارہ کبریٰ خان کی جانب سے اسٹوری پوسٹ شئیر کی گئی جس میں انہوں نے لکھا کہ پہلے تو اس لیے خاموشی اختیار کی کہ جعلی ویڈیو میرے وجود کو نہیں مٹا سکتی، لیکن اب بہت ہو گیا، آپ کو لگتا ہے کہ کوئی بھی شخص بیٹھے بٹھائے مجھ پر انگلی اٹھائے گا تو یہ صرف آپ کی سوچ ہے۔
اداکارہ نے الزام لگانے والے شخص سےمخاطب ہوکر لکھا کہ اس سے پہلے کہ آپ کسی پر انگلی اٹھائیں آپ کے پاس ثبوت ہونے چاہئیں اُنہوں نے لکھا کہ اب آپ کے پاس صرف 3 دن ہیں کہ ثبوت سامنے لائیں، ورنہ اپنا بیان واپس لیں۔
کبریٰ خان نے مزید لکھا کہ میں صرف پاکستانی ہی نہیں بلکہ برطانوی شہری بھی ہوں، اس لیے میں تمہارے پیچھے وہاں بھی آؤں گی کیونکہ میں حق پر ہوں اور میں کسی کے باپ سے بھی نہیں ڈرتی۔
وہیں اداکارہ سجل علی بھی خاموش نہ رہ سکیں اور انہوں نے بھی انسٹاگرام پر اسٹوری پوسٹ شئیر کرتے ہوئے لکھا کہ یہ بہت افسوسناک بات ہے کہ ہمارا ملک اخلاقی طور پر بہت پست ہوگیا ہے۔ انہوں نے کہا کہ کردار کشی انسانیت کی بدترین شکل اور ایک گناہ ہے۔
مہوش حیات بھی پیچھے نہ رہیں اور انہوں نے ویلاگ بنانے والے شخص کو جھوٹا الزام لگانے پر جواب دیتے ہوئے کہا کہ سستی شہرت حاصل کرنے کے لیے کچھ لوگ انسانیت کے درجے سے بھی گرجاتے ہیں، مجھے امید ہے کہ آپ نے اپنی یہ 2 منٹ کی شہرت کا مزہ اٹھایا ہوگا۔
اُنہوں نے مزید لکھا کہ صرف اس لیے کہ میں ایک اداکارہ ہوں تو اس کا مطلب یہ نہیں کہ آپ میرا نام اس طرح مٹی میں ملا سکتے ہیں، کسی ایسے انسان کے بارے میں جسے آپ جانتے بھی نہیں، اس پر ایسے بے بنیاد الزامات لگاتے ہوئے آپ کو شرم آنی چاہیئے اور اس سے بھی زیادہ شرمندہ ان لوگوں کو ہونا چاہیئے جو اس طرح کی باتوں اندھا اعتبار کرلیتے ہیں۔
مہوش حیات نے مزید لکھا کہ یہ سب کچھ ہمارے معاشرے میں موجود گندگی کو ظاہر کرتا ہے لیکن اسے اب اور نہیں! میں کسی کو بھی مزید اپنا نام بدنام کرنے کی اجازت نہیں دوں گی۔
سوشل میڈیا پر اداکاراؤں پر الزام لگانے والے شخص کا کبریٰ خان کی پوسٹ پر رد عمل سامنے آیا جس میں اس نے لکھا کہ مس کبریٰ ایم خان، میں نے آپ کا نام یا بدنامی کسی بھی طرح سے نہیں کی ہے اور اپنے بلاگ پر کسی کے نام کا ذکر کرنے کے بارے میں قیاس آرائیوں کی مذمت کی ہے۔ تاہم، آپ نے قیاس آرائیوں کی بنیاد پر میرا نام صاف اور بدنام کیا ہے۔ آخر میں لکھا کہ اچھی بات ہے کہ آپ برطانیہ آرہی ہیں۔