پاکستان شوبز انڈسٹری کے معروف ہدایت کار، صدا کار، اداکار اور میزبان ضیاء محی الدین 91 برس کی عمر میں علالت کے سبب انتقال کرگئے۔
ضیاء محی الدین کو گزشتہ دنوں بخار اور پیٹ میں شدید تکلیف کے باعث کراچی کے نجی اسپتال میں داخل کیا گیا تھا جس کے بعد آنت کا آپریشن ہوا تھا ، آپریشن کے بعد انتہائی نگہداشت وارڈ منتقل کیا گیا تھا جہاں دورانِ علاج انتقال کر گئے۔
20 جون 1931ء کو فیصل آباد میں پیدا ہونے والے ضیاء محی الدین کے والد کو پاکستان کی پہلی فلم ’تیری یاد‘ کےمصنف اور مکالمہ نگار ہونے کا اعزاز حاصل تھا۔ضیاء محی الدین نے 50ء کی دہائی میں لندن کے رائل اکیڈمی آف ڈراماٹک آرٹ سے اداکاری کی باقاعدہ تربیت حاصل کی۔
70ء کی دہائی میں انہوں نے پی ٹی وی سے ضیاء محی الدین شو کے نام سے منفرد پروگرام شروع کیا۔ 1973ء میں پی آئی اے آرٹس اکیڈمی کے ڈائریکٹر مقرر کر دیے گئے، جنرل ضیا الحق کے مارشل لاء کے بعد وہ واپس برطانیہ چلے گئے، 90ء کی دہائی میں انہوں نے مستقل پاکستان واپس آنے کا فیصلہ کیا۔
ضیاء محی الدین کو ان کی خدمات کے اعتراف میں حکومت نے 2003ء میں ستارۂ امتیاز اور 2012ء میں ہلالِ امتیاز سے نوازا گیا۔ان کی نمازِ جنازہ آج بعد نمازِ ظہر ڈیفنس فیز 4 میں واقع امام بارگاہ یثرب میں ادا کی جائے گی۔