“میں بیمار تھا۔ جس دن تیز رفتار سینچری بنائی اس دن میری طبعیت خراب تھی اور بخار تھا۔ رات کو سو نہیں سکا تھا۔ دوا کھانی تھی اس لئے زبردستی تھوڑا سا کھانا کھایا اور دوا کھائی۔ اس دن میں نے ساتھی کھلاڑی عبداللہ سے کہا کہ اگر میں نے 130 رنز بنائے تو آپ کو عمرہ کا ٹکٹ دوں گا۔

یہ کہنا ہے ملتان سلطانز کے سب سے تیز رفتار رنز بنانے والے کھلاڑی عثمان خان کا۔ عثمان نے انڈیپینڈینٹ اردو کو انٹرویو دیتے ہوئے اپنی بہترین کارکردگی کے بارے میں بتایا کہ جس دن ان کی طبعیت خراب تھی اسی دن کوچ کا میسج آیا کہ آپ کو میچ کھیلنا ہے۔ پھر انھوں نے خود کو میچ کھیلنے کے لئے تیار کیا اور بیناری کے باوجود سینچری بنائی۔

عمرہ کا ٹکٹ کسے دینا ہے؟

عثمان کا کہنا ہے کہ ان کے ساتھ اس وقت عبداللہ موجود تھے اور انھوں نے کہا کہ اگر آج میں 50 رنز بناؤں تو آپ کیا دیں گے تو میں نے کہا آپ کو جو چاہیے وہ دوں گا اور آج اگر میں نے 130 رنز بنائے تو میں آپ کو عمرہ کا ٹکٹ دوں گا۔ اب چونکہ میں نے کہا ہے اور اللہ نے میرا مان رکھا ہے اس لئے میں انھیں عمرہ کا ٹکٹ ضرور دوں گا۔

صرف 43 گیندوں پر 120 رنز

واضح رہے کہ عثمان خان نے صرف 43 گیندوں پر 9 چھکوں اور 12 چوکوں کی مدد سے 120 رنز بنائے ہیں۔