ورلڈ کپ کا شیڈول تبدیل ۔۔ پاک بھارت ٹاکرا اب کب ہوگا؟

آئی سی سی کی جانب سے رواں سال ہونیوالے کرکٹ ورلڈ کپ کے شیڈول میں تبدیلیوں کے اعلان کا آج متوقع ہے۔

میڈیا رپورٹس کے مطابق نوراتری تہوار کی وجہ سے پاک بھارت میچ کو ری شیڈول کرنے کا امکان ہے، پاک بھارت میچ شیڈول سے ایک روز پہلے یعنی 14اکتوبر کو کھیلا جائے گا، اس سے قبل میچ 15 اکتوبر کو احمد آباد میں شیڈول تھا۔

بھارتی کرکٹ بورڈ کے سیکریٹری جے شاہ نے کہا ہے کہ چند بورڈز نے میچز کے درمیان چھ روز کے وقفے کو کم کر کے چار پانچ روز کرنے کی درخواست کی تھی۔جے شاہ کا کہنا تھا کہ ورلڈ کپ میں میچز کے وینیوز میں تبدیلی نہیں ہو گی، صرف تاریخوں کو تبدیل کیا جائے گا۔

پاک بھارت میچ ری شیڈول ہونے کی وجہ سے 14 اکتوبر کو انگلینڈ اور افغانستان کے درمیان ڈے نائٹ میچ 15 اکتوبر کو دن میں کرائے جانے کا امکان ہے۔

پہلے جاری شیڈول کے مطابق پاکستان ورلڈکپ میں اپنی مہم کا آغاز چھ اکتوبر کو حیدرآباد سے کرے گا جہاں اس کا مقابلہ اس وقت جاری ورلڈ کپ کوالیفائر کے بعد سامنے آنے والے پہلے کوالیفائر سے ہو گا ۔اگلا میچ 12 اکتوبر کو حیدرآباد میں ہی کوالیفائر 2 سے ہوگا۔

ورلڈ کپ کا سب سے بڑا مقابلہ یعنی پاکستان انڈیا میچ 15اکتوبر کو ہونا تھا جو اب 14 اکتوبر کو احمد آباد میں نریندر مودی کرکٹ اسٹیڈیم میں کھیلا جائے گا۔

اس کے بعد پاکستانی ٹیم بنگلورو کا رخ کرے گی جہاں 20 اکتوبر کو اس کا مقابلہ پانچ مرتبہ ون ڈے ورلڈکپ جیتنے والی آسٹریلوی ٹیم سے ہوگا۔

پاکستان اور افغانستان کا میچ 23 اکتوبر کو چنئی میں کھیلا جائے گا۔ پاکستان کا اگلا میچ بھی 27 اکتوبر کو جنوبی افریقہ کے خلاف چنئی میں ہی ہے۔

اگر پاکستان ٹیم سیمی فائنل کے لیے کوالیفائی کر جاتی ہے تو یہ بھی ہر صورت کلکتہ میں ہی کھیلا جائے گا۔ ٹورنامنٹ کا فائنل نریندر مودی کرکٹ اسٹیڈیم احمد آباد میں منعقد ہوگا۔